محمد تسکین

بانہال // ضلع رام بن میں پولیس نے سوشل میڈیا پر مذہبی منافرت کے توہین آمیز پوسٹ کرنے پر ایک شخص کے خلاف کیس درج کیا ہے اور اس کی گرفتاری کیلئے کوششیں شروع کر دی ہیں۔
سوشل میڈیا پلیٹ فارم پر مذہبی جذبات کو مجروح کرنے والی ایک توہین آمیز پوسٹ کے ( جس میں اللہ اور اللہ کے رسول صلی اللہ علیہ وسلم کے خلاف نا زیبا الفاظ استعمال کئے گئے ہیں ) منظر عام پر آنے کے بعد رام بن کے علماﺅں اور دینی انجمنوں کی شخصیات نے یہ معاملہ پولیس کی نوٹس میں لایا۔
مقامی آئمہ مساجد اور علماءاکرام نے کشمیر عظمیٰ کو بتایا کہ جامع مسجد میتراہ رام بن میں تمام علماءاکرام اور شہریوں کی مشاورت کے بعد، وہ پولیس کو تحریری شکایت دینے کیلئے ایس ایس پی دفتر رام بن کی طرف جا ہی رہے تھے کہ ایس ایچ او رام بن نے انہیں راستے میں ہی اطلاع دی کہ اس سلسلے میں پولیس سٹیشن رامسو میں ایک کیس درج کیا گیا ہے اور پولیس نے مزید کاروائی شروع کر دی ہے۔ انہوں نے کہا کہ سوشل میڈیا پر توہین آمیز کلمات لکھنے والے شخص کے سوشل میڈیا اکاونٹ کے مطابق وہ تحصیل اکھڑال، پوگل پرستان سے تعلق رکھتا ہے اور آجکل بھٹنڈہ پنچاب کی ایک یونیورسٹی میں زیر تعلیم ہے۔
ایس ایس پی رام بن موہیتا شرما نے کشمیر عظمیٰ کو بتایا کہ اس معاملے میں ایک کیس درج کرکے ملزم کو گرفتار کرنے کی کوشش شروع کی گئی ہے اور ملوث شخص کو جلد ہی گرفتار کیا جائیگا۔