خراب موسمی صورتحال اور شاہراہ بندہونے سے امر ناتھ یاترا پر روک

سید امجد شاہ

جموں//خراب موسمی حالات کے درمیان رام بن ضلع میں جموں سری نگرقومی شاہراہ پر سڑک کے دھنسنے کے بعد جموں کے بیس کیمپ میں امرناتھ یاترا کو روک دیا گیا ہے۔جموں و کشمیر ڈیزاسٹر منیجمنٹ اتھارٹی ے) نے پیش گوئی کی ہے کہ جموں، سانبہ، ادھم پور، ریاسی، کٹھوعہ اور دیگر اضلاع میں اگلے 24 گھنٹوں کے دوران گرج چمک کے ساتھ طوفانی بارش ہونے کا امکان ہے۔عہدیداروں نے کہا”جیسا کہ یاترا معطل کردی گئی ہے، تقریبا 1800 سے 2000 یاتری لکھن پور اور کٹھوعہ ضلع کے کچھ حصوں میں رک گئے ہیں۔ ان یاتریوں کو ضلع میں انتظامیہ کی طرف سے مناسب رہائش فراہم کی گئی ہے‘‘۔عہدیدار نے کہا کہ بھگوتی نگر بیس کیمپ میں روڈ ٹرانسپورٹ کارپوریشن بکنگ کاؤنٹر آج بند رہا اور اس کے مطابق یاتریوں کو کوئی تازہ ٹکٹ جاری نہیں کیا گیا۔انکا کہناتھا”کل تقریباً 65 آر ٹی سی بسیں یاتریوں کے لیے بک کی گئی تھیں اور ان بسوں کو آج صبح (8 جولائی) بھگوتی نگر بیس کیمپ سے بالتل اور پہلگام کے لیے اپنی مزید منزلوں کے لیے روانہ ہونا تھا۔

تاہم، یاترا کو معطل کر دیا گیا تھا اور خراب موسمی حالات کی وجہ سے کوئی یاتری آگے نہیں بڑھ سکی‘‘۔حکام کے مطابق حکام نے یاتریوں کے لیے جموں شہر میں مقامات کی سیر کے لیے جموں درشن بسوں کا انتظام کیا ہے۔دریں اثنا، جموں اور ادھم پور سے جموں اور یاترا کے لیے گاڑیوں کی آمدورفت کی اجازت نہیں دی گئی ہے کیونکہ رام بن ضلع میں پنتھیال ٹنل کو جوڑنے والی T3 اور T5 کو جوڑنے والی سڑک شدید بارش کے بعد ڈھہ گئی۔ادھم پور ضلع میں جموں سری نگر ہائی وے پر 2000 سے زیادہ مسافر و مال بردار گاڑیاںمختلف مقامات پر پھنسے ہوئی ہیں۔ٹریفک حکام کے مطابق سیاحوں اور متعدد یاتریوں کو لے جانے والی گاڑیوں اور کشمیر کے سامان سے لدے ٹرکوں سمیت نجی اور مسافر گاڑیوں کو جکھینی، ریلوے موڑ، گول میلہ، پلاٹہ، سلورہ اور دھر روڈ پر روک دیا گیا ہے۔اسی طرح ٹریفک پولیس نے نگروٹہ میں رام بن اور کشمیر کی طرف گاڑیوں کی آمدورفت کی اجازت نہیں دی۔ گاڑیوں کو واپس لوٹنے کو کہا گیا کیونکہ ر ام بن میں سڑک کے دھنسنے کے بعد ہائی وے بند کر دیا گیا تھا۔اس کے علاوہ کٹھوعہ ضلع میں انتظامیہ اور پولیس نے ضلع میں ندی کے کنارے نشیبی علاقوں کے مکینوں کے لیے الرٹ جاری کیا ہے۔پولیس کی گاڑیوں نے اعلانات کرتے ہوئے لوگوں سے کہا کہ وہ دریا کے کنارے یا ندیوں کے قریب جانے سے گریز کریں۔ دریاؤں میں پانی کی سطح معمول پر ہے، لیکن بارشوں سے دریاؤں میں سیلاب آسکتا ہے اور اس صورتحال نے حکام کو خطرے میں ڈال دیا ہے کہ وہ دریا کے کنارے کے لوگوں کو الرٹ کریں۔اس دوران محکمہ موسمیات کے حکام نے بتایا کہ جموں شہر میں 6.6 ملی میٹر بارش ریکارڈ کی گئی ہے اور ہلکی سے درمیانی بارش کی پیش گوئی کی گئی ہے۔ جموں شہر میں زیادہ سے زیادہ درجہ حرارت 26.8 ڈگری سیلسیس اور کم سے کم درجہ حرارت 24.6 ڈگری سیلسیس رہا۔عہدیداروں نے لوگوں کو گرج/بجلی کے دوران گھر کے اندر رہنے اور تیز بہنے والے آبی ذخائر کے قریب جانے سے گریز کرنے کا مشورہ دیا۔تاہم، جموں و کشمیر ڈیزاسٹر منیجمنٹ اتھارٹی (جے کے ڈی ایم اے) نے زیادہ تر مقامات پر درمیانی بارش/ گرج چمک کے ساتھ بارش کی پیش گوئی کی ہے اور جموں، ادھم پور، ریاسی، کٹھوعہ، ڈوڈہ، رامبن، سانبہ میں کچھ مقامات پر بھاری سے بہت زیادہ بارش ہونے کا امکان ہے ۔