سرینگر// یہ کوئی ڈھکی چھپی بات نہیں کہ 5اگست2019کے فیصلوں کے بعد پیدا شدہ صورتحال اور پھر کورونا وباء سے ہوئے مسلسل لاک ڈاون نے جموں وکشمیر کے عوام کو سخت ترین اقتصادی بدحالی میں مبتلا کردیا ہے اور اس دوران شہر سری نگر کی آبادی سب سے زیادہ متاثر ہوئی کیونکہ 2015میں جی ا-یس ٹی کے اطلاق اور 2016کے خراب حالات کے بعد مسلسل کرفیو کلچر سے پہلے ہی اس تاریخی شہر کے لوگ سخت ترین معاشی بحران کے شکار ہوگئے تھے۔ ایسی صورتحال میں حکومت پر لوگوں کی راحت رسانی کیلئے ٹھوس اقدامات اٹھانے کی ذمہ داری عائد ہوتی تھی لیکن یہاں سب کچھ اس کے عین برعکس ہورہاہے۔ ان باتوں کا اظہار نیشنل کانفرنس کے ترجمان اعلیٰ تنویر صادق نے سری نگر میں پارٹی کے یک روزہ کنونشن سے خطاب کرتے ہوئے کیا۔ انہوں نے کہا کہ موجودہ اقتصادی بدحالی اور معاشی بحران میں یہاں کے دستکاروں، کاریگروں اور محنت کشوں کی راحت کاری کیلئے ایک جامع پیکیج کی ضرورت تھی اور یہاں کے بے روزگار نوجوانوں کو روزگار فراہم کرنے کیلئے ایک جامع لائحہ عمل مرتب کرنا تھا لیکن حکمرانوں کے تمام تر اقدامات اس کے عین برعکس ہیں اور حکومت کا ہر ایک فیصلہ عوام کْش ثابت ہورہا ہے۔انہوں نے کہا کہ پینے کے پانی اور بجلی فیس میں بے تحاشہ اضافہ اور آسمان چھوتی مہنگائی نے پہلے ہی عوام کی کمر توڑ کر رکھ دی ہے کہ اب حکمران پراپرٹی ٹیکس عائد کرکے عوام پر مزید بوجھ ڈلا گیا۔تنویر صادق نے کہا کہ شہر سری نگر میں سمارٹ سٹی کے نام پر جو کام چل رہے ہیں وہ بغیر کسی منصوبہ بندی کے ہورہے ہیں۔ سری نگر میں ٹریفک جام کے دیرینہ مسئلے کو حل کرنے کیلئے جہاں نئی سڑکوں اور فلائی اووروں کی تعمیر کے علاوہ سڑکوں کی کشادگی کی ضرورت تھی ،وہیں انتظامیہ سڑکوں کو بلا وجہ تنگ کرنے میں لگی ہوئی ہے۔ انہوں نے کہا کہ جموں شہر میں گذشتہ سال سائیکل سروس شروع کی گئی لیکن وہاں اس کیلئے کہیں بھی سڑک کو تنگ کرکے علیحدہ ٹریک نہیں بنایا گیا تو پھر سری نگر میں سائیکل سروس کیلئے سڑکوں کر تنگ کرکے علیحدہ ٹریک بنانے کی ضرورت کیوں آن پڑی۔ تنویر صادق نے پارٹی سے وابستہ افراد پر زور دیا کہ وہ پارٹی کی مضبوطی کیساتھ ساتھ خود کو لوگوں کیلئے دستیاب رکھیں اور ان کے دکھ سکھ میں کام آئیں۔ انہوں نے کارکنوں پر زور دیا کہ وہ پارٹی قیادت کے احکامات کے مطابق کام کریں اور پارٹی کو مقدم سمجھ کر خود کو خدمت خلق کیلئے وقف رکھیں۔
سرینگرکانقشہ وسط اپریل سے بدل جائے گا: ارون کمار
چیف سیکریٹری کا شہرکاطوفانی دورہ،ترقیاتی کاموں کاجائزہ لیا
سرینگر//چیف سیکریٹری ڈاکٹر ارون کمار نے پیر کوسرینگر شہرکادورہ کیااور موقعہ پرہی مختلف تعمیراتی کاموں کاجائزہ لیا،جوسمارٹ سٹی کے تحت ہاتھ میں لی گئیں ہیں ۔انہوں نے ہرایک کام کیلئے ڈیڈلائن بھی مقررکی۔چیف سیکریٹری کے ہمراہ صوبائی کمشنر،ڈپٹی کمشنر،کمشنرایس ایم سی اور دیگرحکام بھی تھے۔ڈاکٹر مہتہ نے اس دوران کہا کہ سرینگر شہرمیںاس سال اپریل کے وسط سے بہترتبدیلی آئے گی۔انہوں نے کہا کہ شہر کاچہرہ ہی ان منصوبوں ،جن پراس وقت کام چل رہاہے،کے مکمل ہونے سے بدل جائے گا۔چیف سیکریٹری نے کہاکہ ان کاموں سے شہرکی خوبصورتی میں اضافہ ہوگااوراس طرح مقامی لوگوں اور سیاحوں کیلئے شہرجاذب نظربن جائے گا۔چیف سیکریٹری نے سمارٹ سٹی مشن کے مختلف پروجیکٹوںکے مقامات کادورہ کیا۔انہوں نے ان پروجیکٹوں پرہورہے کام کی پیش رفت کاجائزہ لیااورانہیں جلدازجلدمکمل کرنے کی ہدایت دی۔انہوں نے معینہ مدت کے دوران پروجیکٹوں کی تکمیل پرزوردیا۔
