بلال فرقانی
سرینگر//صوبائی کمشنر کشمیر وجے کمار بدھوری نے ہفتہ کو کہا کہ 15 اپریل کی ڈیڈ لائن سے پہلے سمارٹ سٹی پروجیکٹ مکمل کیا جائے گا جبکہ جی20کے سرینگر میں اجلاس کے حوالے سے اگلے دو ماہ انتہائی اہم ہیں۔انہوں نے کہاہے کہ سرینگر میں سمارٹ سٹی پروجیکٹ کے سلسلے میں کام شدومد سے جاری ہے اور اگلے دو ماہ تک لوگوں کو مشکلات کا سامنا کرنا پڑے گا کیوں کہ کچھ سڑکیں بند ہوں گی البتہ لوگوں کو حکام کے ساتھ تعاون کرنا پڑے گا۔ ڈویژنل کمشنر نے کہا کہ سمارٹ سٹی پروجیکٹ مقرر وقت میں مکمل ہوگا۔ انہوںنے لال چوک میں ترقیاتی کاموں کا جائزہ لینے کے بعد صحافیوں سے بات کرتے ہوئے کہا کہ آنے والے دو ماہ میں لوگوں کو پریشانی کا سامنا کرنا پڑ سکتا ہے کیونکہ ترقیاتی کاموں کو مکمل کرنے کے لیے کچھ سڑکیں بند کر دی جائیں گی۔ ان کا کہنا تھا کہ شہر کے تجارتی مرکز لال چوک میں سمارٹ سٹی پروجیکٹوں کے لئے جاری ترقیاتی کاموں میں تیزی آئی ہے کیونکہ کام دوہرے شفٹوں میں جاری ہے، جبکہ اگلے دو ماہ انتہائی اہم ہیں۔ان کا کہنا تھا’’ہم نے اس وقت کام شروع کیا جب سرینگر میں جی 20 اجلاس کی کوئی تجویز نہیں تھی، لیکن چونکہ یہ اجلاس یہاں منعقد کرنے کی تجویز دی گئی ہے، اس سے ہمیں فائدہ ہوا ۔
