سرینگر میں جگہ جگہ جامہ تلاشیاں،سینکڑوں موٹر سائیکلوں کی ضبطی

بلال فرقانی

سرینگر// یوم جمہوریہ کے پیش نظر وادی کشمیر میں بالعموم جبکہ گرمائی دارلحکومت سرینگر میں بالخصوص سیکورٹی فورسز کی جانب سے چوکسی بڑھانے کے ساتھ ساتھ گاڑیوں اور مسافروں کی تلاشی لینے کا سلسلہ تیز کردیا گیا ہے۔شہر کے کئی علاقوں میں ناکہ چیکنگ کے دوران گذشتہ ایک ہفتے سے قریب 200موٹر سائیکلوں اور سکوٹروں کو نامکمل کاغذات رکھنے کی وجہ سے ضبط کیا گیا ہے اور انکا چالان کردیا گیا ہے۔ جمعرات کو بھی شہر میں سیکورٹی فورسز کی جانب سے راہگیروں اور مسافروں کی جامہ تلاشی کا سلسلہ دن بھر جاری رہا جس دوران لوگوں کے شناختی کارڈ باریک بینی سے چیک کئے جارہے تھے۔ جمعرات کے روز سیکورٹی فورسز نے مختلف مقامات بالخصوص سیول لائنز میں متعدد جگہوں پر ناکے بٹھائے جہاں گاڑیوں اور ان میں سوار مسافروں کی تلاشی لی جارہی ہے۔ سیکورٹی فورسز کی جانب سے لالچوک ،ایم اے روڑ، قمرواری، عیدگاہ، سکہ ڈافر، کاکہ سرائے، بڈشاہ چوک، پارمپورہ اور منور آبادمیں چیک پوائنٹس قائم کئے گئے تھے۔ انہوں نے بتایا کہ ان چیک پوائنٹس پر تعینات سیکورٹی فورس اہلکار گاڑیوں بالخصوص دو پہیہ موٹر گاڑیوں (موٹر سائیکلوں) کی تلاشی لے رہے تھے۔ وادی کے مختلف اضلاع کو سرینگر سے جوڑنے والی سڑکوں پر بھی ناکے بٹھائے گئے ہیں۔