نیوز ڈیسک
سانبہ//حکام نے جموں صوبہ کے سانبہ ضلع میں بین الاقوامی سرحد کے قریب 1کلومیٹر علاقے میں رات 9بجے سے صبح 6 بجے تک رات کا کرفیو نافذ کر دیا ہے۔
ڈپٹی کمشنر سانبہ کی طرف سے جاری کردہ ایک حکم کے مطابق، بی ایس ایف حکام نے بارڈر سیکورٹی پر ضلع سطح کی قائمہ کمیٹی کی میٹنگ کے دوران، رات کو کرفیو نافذ کرنے کا معاملہ اٹھایا تاکہ سرحدی علاقے میں کرفیو سے وہ اپنے فرائض کو زیادہ مؤثر طریقے سے انجام دے سکیں ۔
حکم نامے میں کہا گیا ہے کہ بی ایس ایف حکام کی طرف سے سرحدی علاقوں کے ایک کلو میٹر دائرہ میں مشکوک سرگرمیوں اور نقل و حرکت کو روکنے کے لیے لوگوں کی نقل و حرکت پر پابندی ضروری ہے۔
اُنہوں نے کہا ،”ضلع انتظامیہ یہ محسوس کرتی ہے کہ یہ مناسب ہے کہ سرحدی علاقوں میں لوگوں کی نقل و حرکت کو کنٹرول کیا جائے تاکہ سرحدی علاقے میں بی ایس ایف کا بہتر تسلط قائم ہو اور بھارتی سلامتی کے خلاف دشمن قوتوں کے مذموم عزائم کو ناکام بنایا جائے”۔
اس میں مزید کہا گیا ہے کہ کوئی بھی شخص یا افراد کا گروہ، ضلع سانبہ میں بین الاقوامی سرحد کے قریب 1کلومیٹر تک کے علاقوں میں رات 9بجے سے صبح 6 بجے تک حرکت نہیں کرے گا۔”اگر نقل و حرکت ضروری ہو تو، فرد یا افراد کو بی ایس ایف اور پولیس حکام کو اپنے متعلقہ شناختی کارڈ پیش کرنے کی ضرورت ہے”۔
اس میں مزید کہا گیا ہے کہ کوئی بھی شخص حکم کی خلاف ورزی کرتا ہوا پایا گیا تو اس کے ساتھ قانون کے مطابق نمٹا جائے گا۔
حکم نامہ کے مطابق،”چونکہ انفرادی طور پر آرڈر کی پاسداری کرنا ممکن نہیں ہے، اس لیے اسے ایک طرفہ جاری کیا جا رہا ہے۔ یہ حکم فوری طور پر نافذ العمل ہو گا اور اس کے اجراء کی تاریخ سے دو ماہ کی مدت تک نافذ رہے گا،اسے پہلے ہی واپس لیا جا سکتا ہے یا منسوخ بھی کیا جا سکتا ہے”۔
