پارلیمنٹ کی نئی عمارت کو ڈاکٹرامبیڈکر پارلیمنٹ ہاؤس کا نام دینے کی قرارداد منظور

جموں// آل انڈیا کنفیڈریشن آف ایس سی/ ایس ٹی/ او بی سی آرگنائزیشنز جے اینڈ کے کے ایک ونگ دلت او بی سی اقلیت (ڈی او ایم) نے کنفیڈریشن کی طرف سے 28 نومبر 2022 کو رام لیلا میدان، نئی دہلی میںمنعقد کی جانے والی قومی ریلی کی حمایت کے لیے گرودوارہ گرو نانک دیو جی آڈیٹوریم، چاند نگر جموں میں ایک بیداری میٹنگ کا اہتمام کیا۔ میٹنگ کا بنیادی ایجنڈا ریلی کی حمایت کے لیے ایک قرارداد پاس کرنا تھا اور اجلاس میں موجود تمام لوگوں نے متفقہ طور پر حمایت کا اظہار کیا۔ دہلی میں ہونے والی قومی ریلی میں جموں و کشمیر کے تمام شعبہ ہائے زندگی سے تعلق رکھنے والے لوگ شرکت کریں گے۔آر کے کلسوترا، چیئرپرسن ڈی او ایم اور صدر کنفیڈریشن نے کہا کہ دہلی میں نیشنل ریلی کا انعقاد نئی پارلیمنٹ بلڈنگ کو ڈاکٹر بی آر امبیڈکر پارلیمنٹ ہاؤس کے نام سے کرنے کے لیے کیا جا رہا ہے۔ یہ ہندوستانی آئین کے باپ کو حقیقی خراج عقیدت ہوگا۔ انہوں نے مزید کہا کہ ریلی میں ایس سی/ایس ٹی/او بی سی اور اقلیتوں کے بارے میں مختلف دیگر ایجنڈے اٹھائے جائیں گے۔ ان میں ملک بھر میں سرکاری شعبوں اور تعلیمی اداروں کی مسلسل نجکاری بھی شامل ہے۔اس طرح قومی جلسے میں ان مسائل کی حمایت کی قرارداد پیش کی گئی اور اسے بھرپور حمایت کے ساتھ منظور کر لیا گیا۔