عمران خان کا سب سے زیادہ ٹیسٹ میچ کا ریکارڈ

شارجہ//پاکستان ٹیسٹ کرکٹ ٹیم کے کپتان مصباح الحق نے سب سے زیادہ ٹیسٹ میچوں میں کپتانی کا عمران خان کا ریکارڈ توڑ دیا ہے ۔کرک انفو کی رپورٹ کے مطابق ویسٹ انڈیز کے خلاف سیریز کے تیسرے ٹیسٹ میچ میں بطور کپتان شرکت کرکے مصباح الحق نے یہ اعزاز اپنے نام کیا۔یہ بطور کپتان مصباح الحق کا 49 واں ٹیسٹ میچ ہے جبکہ بطور ٹیسٹ کپتان میچ کی نصف سنچری مکمل کرنے کے لیے انہیں مزید ایک میچ درکار ہے ۔42 سالہ مصباح الحق کو 2010 میں ٹیسٹ ٹیم کا کپتان بنایا گیا تھا جس کے بعد مصباح الحق شاندار پرفارمنس کی بدولت اس منصب پر فائر رہے اور شارجہ ٹیسٹ جیت کر وہ اس میچ کو مزید یادگار بنا سکتے ہیں۔مصباح الحق ویسٹ انڈیز کے خلاف شارجہ ٹیسٹ میں 49 ویں میچ میں کپتانی کے فرائض انجام دے رہے جبکہ اس سے قبل سب سے زیادہ ٹیسٹ میچوں میں کپتانی کا ریکارڈ عمران خان کا تھا جنہوں نے 1982 سے 1992 کے دوران 48 میچوں میں کپتانی کی تھی۔اعداد و شمار کے مطابق مصباح الحق اور عمران خان کی کپتانی میں پاکستان کرکٹ ٹیم کی فتح اور شکست کا ریکارڈ بھی کافی مختلف ہے۔ مصباح الحق کی کپتانی میں پاکستان کرکٹ ٹیم نے 24 میچوں میں کامیابی حاصل کی جبکہ 13 میچوں میں شکست ہوئی اور 11 میچ ڈرا ہوئے ۔عمران خان کی کپتانی میں پاکستان نے 48 میں سے 14 میچزوں میں کامیابی حاصل کی، 8 میں شکست ہوئی جبکہ 26 میچ ڈرا ہوئے ۔ٹیسٹ کرکٹ کی تاریخ میں سب سے زیادہ میچ بطور کپتان کھیلنے کا اعزاز جنوبی افریقہ کے سابق کپتان گریم اسمتھ کے پاس ہے جنہوں نے 2003 سے 2014 کے دوران 109 میچوں میں قیادت کی۔یواین آئی۔