نیو یارک // اقوام متحدہ نے بھارت اورپاکستان کویہ 70سالہ دیرینہ تنازعہ تعامل اورمذاکرات کے ذریعے حل کرنے کی تلقین کی۔یواین سیکرٹری جنرل اینٹونیوگونترس کے ترجمان اسٹیفن دوجارک نے لائن آف کنٹرول پرفوجی مبصرین کے ذریعے جنگ بندی خلاف ورزیوں کی تحقیقات کرانے کااعلان کرتے ہوئے کہاکہ عالمی ادارہ ہندوپاک پرزوردیتاہے کہ وہ کشمیرکے مسئلے اورسرحدی کشیدگی کوپُرامن ذرائع سے حل کریں ۔ ترجمان اسٹیفن دوجارک نے بھارت اور پاکستان کی افواج کے درمیان جموں وکشمیر کو تقسیم کرنے والی لائن آف کنٹرول پر جاری ٹکرائو کی صورتحال پر سخت تشویش کرتے ہوئے نامہ نگاروں کو بتایاکہ اقوام متحدہ فوجی مبصرین ایل ائو سی کے آر پار جنگ بندی کی خلاف ورزیوں کے نتیجے میں پیدا ہونے والی صورتحال کا جائزہ لیں گے۔ انہوں نے کہا کہ اقوام متحدہ کے متعین کردہ فوجی مبصرین کو یہ ذمہ داری سونپی گئی ہے کہ وہ اس بات کی تحقیقات کریں کہ لائن آف کنٹرول پر ہونے والی جنگ بندی کی خلاف ورزیوں کیلئے کون ذمہ دار ہے۔اسٹیفن دوجارک کا کہنا تھاکہ بھارت اور پاکستان کی افواج ایک دوسرے پر سیز فائر خلاف ورزیوں کا الزام عائد کرتی رہی ہیں اور اقوام متحدہ فوجی مبصرین اسی تناظر میں اس بات کا پتہ لگانے کی کوشش کریں گے کہ کون سی فوج جنگ بندی خلاف ورزیوں کیلئے ذمہ دار ہے۔
فوجی مبصرین لائن آف کنٹرول پر خلاف ورزیوں کی تحقیقات کریں گے
