سرینگر//ایم ایل اے کنگن میاں الطاف احمد نے کل ریاستی کلچرل اکیڈیمی کے سیمینارہال میں منعقدہ ایک تقریب کے دوران3 گوجری کتابوں کی اجرائی انجام دی۔اس سلسلے میں منعقدہ تقریب پر نامورادیب چوہدری اقبال عظیم، ڈاکٹرعزیزحاجنی سیکریٹری کلچرل اکادمی،پروفیسر عبدالطیف کھٹانہ نیشنل سکول آف ڈرامانئی دہلی، ڈاکٹرجاویدراہی چیف ایڈیٹرگوجری کلچرل اکیڈیمی ، چوہدری غلام عباس پریس انفارمیشن بیورو، چوہدری سلام دین بجاڑ صدرادبی سنگت ، چوہدری جی ۔ڈی طاہر دوردرشن کیندرسرینگر، قیصردین قیصر ایوان صدارت میں موجود رہے۔اس موقعہ پر عبدالغنی عارف کا’تاہنگ‘‘، عبدالحمید کھٹانہ کا ’لشکارہ‘ اور چوہدری تاج الدین تاج کا ’’خواب سلونہ ‘‘نامی تین شعری مجموعے ریلیزکئے گئے ۔اس موقعہ پر خطاب کرتے ہوئے میاں الطاف احمد نے کہاکہ گوجری گذشتہ کچھ سالوں میں بڑی تیزی کے ساتھ ترقی کرنے والی ادبی زبان کے طورپراُبھری ہے جس کاسہرا ادباء، شعرا،محققین ،فنکاروں اورادبی اداروں کوجاتاہے۔انہوں نے عبدالغنی عارف، حمیدکسانہ اورتاج الدین تاج کو ادبی کام کیلئے مبارکبادپیش کی۔ڈاکٹرعزیزحاجنی نے کہاکہ جلدہی اکیڈیمی پیرپنچال میں گوجری موسیقی پروگرام منعقدکرے گی۔ڈاکٹرجاویدراہی نے کہاکہ نئی گوجری شعری مجموعوں کو انٹرنیٹ پراپ لوڈ کیاجائے گا۔قبل ازیں چوہدری سلام دین بجاڑنے استقبالیہ خطاب میں تنظیمی کی سرگرمیوں پرروشنی ڈالی۔اس موقعہ پر چوہدری اقبال عظیم، قیصرالدین قیصر، ایم منشاخاکی، مجیدحسرت، عبدالسلام کوثری اوررفاقت غازی نے بھی خیالات کااظہارکیا۔
کلچرل اکیڈیمی میں تقریب
