نعیم اختر کا رفیع آبا د حلقے کا دورہ

 بارہمولہ//تعمیرات عامہ کے وزیر نعیم اختر نے رفیع آباد حلقے کے تفصیلی دورے کے دوران کہا کہ مختلف ترقیاتی پروجیکٹ بشمول گنجانیت کو کم کرنا ، میکڈم بچھانا ،سڑکوں کو وسعت دینا اور دیگر ایسے پروجیکٹ رفیع آباد حلقے میں تبدیلی کے باعث بنیں گے۔ان باتوں کا اظہار وزیر نے رفیع آباد میں کئی عوامی وفود کے ساتھ بات کرتے ہوئے کیا۔انہوںنے مختلف پروجیکٹوں پر جاری کام کا جائزہ لیتے ہوئے افسروں کو تمام پروجیکٹ فوری طور مکمل کرنے کی ہداتی دی۔انہوںنے حلقے کے مختلف سڑکوں پر میکڈم بچھانے اور سڑکوں کو وسعت دینے کے احکامات بھی دئیے۔وزیر نے لوگوں کو یقین دلایا کہ ترقیاتی پروجیکٹوں کی راہ میں حائل رکاوٹوں کو دورہ کیا جائے گا۔وزیر نے روہامہ ۔شتلو ۔کھاہمو سڑک پر میکڈم بچھانے کا اعلان کیا۔ انہوںنے کہا کہ لوگ جہاں کہیں زمین فراہم کریں گے حکومت سڑک تعمیر کرے گی۔انہوں نے روہامہ میں زمین کھسکنے کے مسئلے پر قابو پانے کے لئے ماہرین سے رائے طلب کرنے کے لئے بھی کہا۔وزیر نے شالہ کوٹ میں عوامی اجتماع سے خطاب کرتے ہوئے لوگوں کو سرکاری سکیموں سے استفادہ کرنے کی تلقین کی۔انہوںنے باغ مالکان کو اپنے باغات میں سیبوں کے اعلیٰ معیاری پودے لگانے کی صلاح دی۔نعیم اختر نے شالہ کوٹ میں بلدیاتی سہولیات میں بہتری کے لئے اپنے کانسچیونسی ڈیولپمنٹ فنڈ میں سے 3لاکھ روپے دینے کا بھی اعلان کیا۔وزیر موصوف نے جہامہ ،ڈنگی وچہ ، زیتن ،پکواڑہ ،روہامہ ، برمن ،پنزولہ ، شتلو ،کھاہمواور سوئین کے علاوہ دیگر کئی علاقوں کا بھی دورہ کیا۔ دورے کے دوران وزیر نے کہا کہ حکومت ریاست کو مقامی لوگوں کوسیاحوں کے لئے یکساں طور دلکشی کا باعث بنانے کے لئے اقدامات کر رہی ہے ۔انہوں نے کہاکہ رفیع آباد حلقے کا برمن علاقہ انتہائی خوبصورت ہے اور حکومت اس کو سیاحتی نقشے پر لانے کے لئے کام کر رہی ہے۔انہوں نے کہا کہ حلقے میں اس طرح کے اور بھی مقامات موجود ہیں جنہیں سیاحتی مقامات کے طور فروغ دیا جائے گا۔سوئین کے دورے کے دوران وزیر نے سڑکوں پر میکڈم بچھانے کے کام میں سست رفتاری پر ناراضگی کا اظہار کیا۔ انہوںنے چیف انجینئر کو ہدایت دی کہ متعلقہ جوئنیر انجینئر کو اٹیچ کر کے میکڈم بچھانے کے کام میں غیر معیاری مواد استعمال کرنے کے معاملے کی تحقیقات کریں۔اس دوران کئی عوامی وفود نے اپنے مسائل وزیر کی نوٹس میں لائے ۔وزیر موصوف نے ان کے مسائل غور سے سننے کے بعد جائز مطالبات ترجیحی بنیادوں پر پورا کرنے کا یقین دلایا۔ سابق ممبر اسمبلی دلاور میر اور تعمیرات عامہ و پی ایم جی ایس وائی کے چیف انجینئر صاحبان کے علاوہ جے کے پی سی سی کے منیجنگ ڈائریکٹر اور ضلع انتظامیہ کے کئی افسران وزیر موصوف نے ہمراہ تھے۔