برکینا فاسو// مغربی افریقہ کے ملک برکینا فاسو کے ایک ریسٹورنٹ پر ہونے والے حملے میں 17 افراد ہلاک جبکہ 8 زخمی ہوگئے۔ فرانسیسی خبر رساں ادارے اے ایف پی کی رپورٹ کے مطابق برکینا فاسو کی حکومت نے حملے میں متاثر ہونے والے افراد کی تعداد کی تصدیق کی۔واقعے کے عینی شاہدین کے مطابق اتوار کی شام پِک اپ ٹرک میں سوار تین مسلح حملہ آور ترک ریسٹورنٹ میں داخل ہوئے اور وہاں موجود افراد پر فائرنگ شروع کردی۔ حملے کے بعد حکومت کی جانب سے جوابی آپریشن کا آغاز کیا گیا۔جوابی کارروائی کے آغاز سے قبل پولیس نے علاقے میں موجود شہریوں کو محفوظ مقامات پر منتقل کیا جس کے بعد فائرنگ کا تبادلہ شروع ہوا۔ حکومت کی جانب سے جاری ہونے والے بیان میں کہا گیا کہ 'استنبول ریسٹورنٹ پر حملے میں 17 افراد کی جانیں لیں جن کی قومیت کی شناخت ہونا باقی ہے، جبکہ واقعے میں 8 افراد زخمی ہوئے'۔ وزیرِ رابطہ ریمس ڈینڈ جینو کا کہنا تھا کہ اب تک حملہ آوروں کی تعداد کا اندازہ نہیں لگایا جاسکا ہے۔ دوسری جانب پیرامیڈیکل اسٹاف کے مطابق ہلاک ہونے والوں میں ایک ترک شہری بھی شامل ہے، جو ہسپتال کے راستے میں دم توڑ گیا۔
برکینا فاسو: ریسٹورنٹ پر حملہ 17 افراد ہلاک
