ریاستی یونیورسٹیوں کیلئے ساتویں تنخواہ کمیشن کومنظوری

سرینگر//گورنر این این ووہرا جو یونیورسٹی آف کشمیر، یونیورسٹی آف جموں، سکاسٹ کشمیر اورسکاسٹ جموں کے چانسلر بھی ہیں، نے یکم جنوری2016 سے ان یونیورسٹیوں کے عملے کے حق میں ساتویں تنخواہ کمیشن کی عمل آوری کو منظوری دی ہے۔اس حوالے سے منصوبہ وزیر اعلیٰ جو ان یونیورسٹیوں کی پرو چانسلر بھی ہیں، کی منظوری کے بعد گورنر کو بھیجا گیا۔اس فیصلے سے سالانہ130 کروڑ روپے کا مالی بوجھ پڑے گا جبکہ ملازمین کے بقایاجات کی رقم200 کروڑ روپے بنتی ہے جو ملازمین کو یکم جنوری2019 ء، یکم جنوری2020 اوریکم جنوری2021 کو تین سالانہ اقساط میں دی جائے گی تا ہم پنشنروں کے بقایاجات ریاستی حکومت کی جانب سے وضح کئے گئے نقش راہ کے مطابق ادا کئے جائیں گے۔