گورنر انتظامیہ گراں فروشی روکے

  چار سال قبل مرکز میں نریندر مودی کی سربراہی میں بھاجپا نے اقتدار سنبھالا تو لوگوں کی امیدیں بندھی تھیںکہ کچھ نہیں تو کم از کم انہیں مہنگائی سے چھٹکارا ملے گا، روزگار ملے گا، زندگی کی بنیادی سہولیات ملیں گی۔ عام جنتا کے لئے اچھے دنوں کی آمد کا مدعا ومقصد یہی کچھ ہوسکتا ہے ۔ بلاشبہ بھاجپا کی کامیابی کے پیچھے اصل راز بھی یہی تھا کہ لوگوں کی اکثریت ملکی معیشت میں ایک دیرپا اور نتیجہ خیز تبدیلی کے خواہا ں تھے تاکہ ان کو روز مرہ کے مسائل ومشکلات سے گلو خلاصی ملے۔ تبدیلی کے اس خواب کو مودی نے بروقت بھانپ کر عام لوگوں کی اس قلبی آرزو کو ایک سیاسی حقیقت میں بد لنے کی ٹھان لی اور اپنی کارگر وموثر تشہیری اسٹرٹیجی وضع کرکے خودکو کانگریس کے متبادل کے طورپیش کیا۔ا ب کی بار مودی سرکار کے نعرے کا لب لباب یہی تھا کہ لوگ ان کو وٹ ڈال کراپنی گردنوں کو مہنگائی ، بدعنوانی اور ہمچوقسم کے مصائب ومشکلات سے نجات پائیں گے ۔ ظاہر ہے اس نعرے میں رائے دہندہ گان کو اپنے لئے راحت کا پیغام نظر آیا تھا، ا س لئے انہوں نے کانگریس سے نظر یں پھیر کر بھاجپا کے حق میں ووٹ ڈال دئے لیکن بہت جلدعوام الناس کو جب ریل کرائے اور کنگ گیس کے نرخوں میں اضافے کا تلخ گھونٹ اپنے گلے کے نیچے اُتارنا پڑ ا تو انہیں لگاکہ ان کے سب خواب چکنا چور ہوگئے ۔ گزشتہ چار سال سے زائد عرصہ سے عوام کی معاشی مشکلات، بے روزگاری اور مہنگائی میں لگاتار اضافہ ہی جاری ہے۔ یہ بات اپنی جگہ دُرست ہے کہ انتخابی وعدے کرتے ہوئے سیاسی لیڈروں کے لئے خیالی جنتیں بنا نا آسان ہوتاہے مگر عمل کی دنیا میں انہیں قائم کر کے دکھانا بہت کٹھن ہوتا ہے ۔ مودی اس عموم سے مستثنیٰ نہیں۔ بہرصورت ملکی سطح پر مہنگائی کا کچھ زیادہ ہی اثر ریاست میں دیکھا جارہا ہے ۔ حق یہ ہے کہ یہاںکمر توڑ مہنگائی میں کمی آنے کی بجائے ہر گزرتے دن کے ساتھ اس میں شدت وحدت پیدا ہو رہی ہے۔ طرفہ تماشہ یہ ہے اشیائے خوردنی کی قیمتیں من مانے انداز میں چڑھتی جارہی ہیں۔ اس وقت بازاروں کا حال یہ ہے کہ آٹے دال ، ساگ سبزی اور گوشت پولٹری وغیرہ کے نرخ آسمان کو چھو رہے ہیں۔ کہنے کو جو سرکاری طور نرخ نامے مشتہر کئے جاتے ہیں ، خرید وفروخت میں عملاًان کی طرف گاہک یا دوکاندار ادنیٰ سی بھی توجہ نہیں دیتے ۔ دوکاندار تو دوکاندار ، خریدار بھی یہ قبل ازوقت جا ن رہے ہوتے ہیں کہ کسی چیز کی جو قیمت ریٹ لسٹ پر دی گئی ہے،اس کا بیچنے یا خریدنے میں قطعاًکو ئی عمل دخل نہیں ۔ بے شک صارفین کو خود غرض کا روباری حلقوں سے بچانے کے لئے ایک سرکاری صیغہ مارکیٹ چکنگ اسکارڈ کے نا م سے موجودہے مگر یہ مکمل طور مفلوج ہے۔ یہ صیغہ کھلے عام گراں فروشوںاور ذخیرہ اندوزوں کے مافیا کا توڑ کر نے سے کنی کترارہا ہے ، شاید وجہ یہ ہے کہ انہی کے دم قدم سے ان سرکاری اہل کاروں کااپنا حقہ پانی چلتا رہتاہے ۔ نتیجہ یہ کہ عام آ دمی یا صارف کو بازاروںمیں ہر چیزسر کاری نرخوں پر نہیں بلکہ دوکانداروں اور ریڑھی بانوں کی منہ ما نگی قیمتوں پر حاصل کر نا پڑ رہی ہے ۔ ایڈمنسٹریشن کی تغافل شعاری کی اصل وجہ یہ ہے کہ برسہا برس سے یہاں ایک ایسا سیاسی کلچر پنپ رہاہے جس کی عنا یات سے معمولی سرکاری اہل کار سے لے کر اعلیٰ افسرتک کومواخذے کاڈر یا جوابدہی کااحساس ان کی موٹی کھال کو چھوکر بھی نہیں جا تا ۔ لہٰذا ان کوکبھی یہ چٹی نہیں پڑتی کہ ذراسا بھی عوامی راحت کو تھوڑی بہت اہمیت دیں ۔ ہاں،یہ فکر ضرور لگی رہتی ہے کہ کسی طرح حرام کمائی سے اپنی جیبیں موٹی کریں ۔ اس نراج کے سبب عام صارفین کو بازاروں میں جو مختلف النو ع ما ریں سہنا پڑ رہی ہیں،ان کے طفیل غر باء کا زندہ رہنا دشوار سے دشوار تر ہو رہا ہے ۔ ان ناگفتہ بہ حالات میں ڈویژ نل انتظامیہ کی فعالیت سے عام آدمی کا کچھ نہ کچھ بھلا ہو تا ، لیکن اس کا وجود بھی محض علامتی سادکھائی دے رہا ہے ۔ بنا بریں عام آد می بازاروں میں ساری بلا ؤ ں کا تختۂ مشق بن رہا ہے ۔ حال یہ ہے کہ نانوائی روز بروزروٹی کا وزن کم کر رہے ہیں ، قصاب گو شت کے سرکا ری ریٹ لسٹ کی جگہ اپنی من مانی کے خوگر بنے ہوئے ہیںاور اس وقت وہ سی کلاس قسم کا گوشت کھلے بندوں اپنے وضع کردہ ریٹ لسٹ کے مطابق گارگاہکوں کے ہاتھ تھما دیتے ہیں ، سبزی فروش گاہکوں سے اپنے ہی مقررکردہ قیمتیں وصول کرتے ہیں ۔ ایسے میں نمائشی طور ہی سہی کسی بھی جگہ ما ر کیٹ چیکنگ اسکا رڈ کا کوئی نام ونشان نہیں دِکھتا۔ حکام کا یہ انو کھا اسلوبِ کا ر دیکھ کر عام آدمی کویہ سوال چکرا تا ہے کہ آخر سرکا ری محصولات سے لے کر اشیا ئے خور دنی تک کی قیمتیں متواتر آسمان تک بڑ ھا کر عام آ دمی کو بلی کا بکرا بنانے میں انتظامیہ کوذ ہنی سکون کیو ں محسو س ہورہا ہے؟ آج تک یہی دیکھا گیا ہے کہ عام لوگ اپنی یہ دُرگت ہو تے ہو ئے دیکھ کر کبھی حرف شکا یت زبا ن پر لا نے کی بھو ل کر یں تو پولیس ڈنڈوں سے ان کی زبا ن بند ی کرائی جا تی ہے،پانی کا مطا لبہ پر ماریں کھا تے ہیں، بجلی سپلا ئی میں معقولیت کی مانگ ہو تو حاکمان ِ وقت سے گراں گوشی کی بے نیازی پا تے ہیں،سڑک اور نالی کی تعمیر و مرمت میںبے انتہاتساہل کارونا رویں تو کسی اتھارٹی کے کا ن پر جو ں تک نہیں رینگتی۔ بہر صورت گورنر انتظامیہ واقعی چاہتی ہے کہ یہ فاسد کلچر عام آ دمی کا بیڑہ مزید غرق نہ کر ے تو اسے اول گراں فروشی کے حوالے سے قانو ن شکنی کے مرتکب ہر فرد بشر کو پکڑنا چا ہیے ، دوم عوامی خدمات کے شعبے میں فوراً سے پیشتر سدھار لا یا جا  نا چا ہیے تاکہ پبلک سروسز گارنٹی ایکٹ ایک کاغذی گھوڑا ثابت نہ ہو ، سوم گرا ں بازاری کے ذمہ دار عنا صر کو قانون کی اتنی خوراک پلانی چاہیے جو اس عام تا ثر کو جھٹلا سکے کہ خو د انتظامی مشنری کے کارندے مہنگا ئی کوبڑ ھا وا دینے والو ں کی پشت پنا ہی کر رہے ہیں ، چہارم مارکیٹ چیکنگ اسکارڈ کو جمود کے لحاف سے نکال باہر کر نا چاہیے ، پنجم بلیک مارکیٹنگ کرنے والوں کو فی ا لفور ایسی کڑی سزا دی جا ئے کہ دوسرے عبرت پکڑیں ۔ اگر عملا ً یہ سب کیا گیا تویہ عام آ دمی کے تئیںگورنر راج کا جذ بۂ خیر سگا لی سمجھا جائے گا جس کی صرف ایک جھلک دیکھنے کے لئے لوگ گز شتہ سالہا سال سے ترس رہے ہیں۔