سرینگر/پولیس نے بدھوار کو کہا کہ شمالی کشمیر کے بانڈی پورہ ضلع میں حالیہ برفباری کے بعد سے دو افراد لاپتہ ہیں۔لاپتہ شہریوں کے بارے میں بتایا جاتا ہے کہ وہ ویوان نامی گاﺅں کے رہنے والے ہیں۔
حکام کا کہنا ہے کہ سات افراد گذشتہ ہفتے کسی کام کے سلسلے میں کوتھ پتھری نامی جنگلی علاقے میں گئے تھے ۔ اُنہوں نے موسمی صورتحال تبدیل ہونے کے ساتھ ہی واپسی کا سفر اختیار کیا۔پانچ افراد تو حفاظت کے ساتھ اپنے گھروں کو پہنچ گئے جبکہ شدید برفباری کے دوران دو افراد راستہ بھٹک گئے۔
مقامی ذرائع نے دو لاپتہ افراد کی شناخت غلام قادر اور عبد الاحد شیخ کے طور کرتے ہوئے کہا کہ وہ ویوان گاﺅں کے رہنے والے ہیں۔
حکام کا کہنا ہے کہ پولیس کی ایک ٹیم علاقے میں موجود ہے اور دونوں کی تلاش جاری ہے۔
واضح رہے کہ 3نومبر کو وادی بھر میں شدید برفباری ہوئی جس کی وجہ سے روز مرہ کی زندگی بری طرح متاثر ہوئی جبکہ بالائی علاقے کٹ کر رہ گئے۔
