سرینگر/ریاست میں پنچائتی انتخابات کے چوتھے مرحلے میں منگل کو ریاست بھر میں مجموعی طور پر71.3 فیصد ووٹنگ درج کی گئی۔چیف الیکٹورل افسر جموں وکشمیر شالین کابرا کے مطابق جموں صوبے میں82.4 فیصد جبکہ کشمیر صوبے میں32.3فیصد رائے دہندگان نے اپنے حق رائے دہی کا استعمال کیا۔
شالین کابرا نے ضلع وار تفصیلات دیتے ہوئے کہا کہ کپواڑہ میں56.1 ، بانڈی پورہ میں24.4 ، بارہ مولہ میں62.4 ، بڈگام46.3 ، پلوامہ میں0.6 ،کولگام میں14.5 ، اننت ناگ میں6.2 ،کشتواڑ میں82.3 ،ڈوڈہ میں84.6 ،رام بن میں81.1 ، اودہمپور میں78.9 ،کٹھوعہ میں80.7 ، جموں میں85.2 ،راجوری میں81.8 اور پونچھ میں82.5 فیصدپولنگ درج کی گئی۔
سی ای او نے مزید کہا 17 نومبر2018 کومنعقدہ پہلے مرحلے میں74.1 فی صد پولنگ مجموعی طور پر ریکارڈ کی گئی جس میں64.5 کشمیر صوبے جبکہ79.4 فیصد ووٹنگ جموں صوبے میں ریکارڈ کی گئی۔
اسی طرح پنچائتی انتخابات کے دوسرے مرحلے میں ریاست میں71.1 فیصد ووٹ ڈالے گئے تھے جن میں سے80.4 فیصد پولنگ جموں صوبے اور52.2 فیصدپولنگ کشمیر صوبے میں دیکھنے کو ملی۔
انہوں نے مزید کہا کہ تیسرے مرحلے کے دوران75.2 فیصد ووٹنگ ریکارڈ کی گئی جس میں سے55.7 کشمیر صوبے جبکہ83.0 جموں صوبے میں درج کی گئی۔
پنچائتی انتخابات کے پانچویں مرحلے کی ووٹنگ29 نومبر2018 کو ہوگی۔
چیف سیکرٹری بی وی آر سبھرامنیم نے انتخابات کو چیلنجوں کے باوجود آزادانہ ماحول میں منعقد کرانے کے لئے گورنر ستیہ پال ملک کی جانب سے سول اور پولیس انتظامیہ کے کام کی سراہنا کرتے ہوئے انہیں مبارک باد دی ہے۔
