سرینگر/پولیس نے سوموار کو دعویٰ کیا کہ اُنہوں نے جنوبی کشمیر کے پلوامہ ضلع میں جنگجوئوں کے دو نیٹ ورک بے نقاب کرتے ہوئے عسکریت پسندوں کے دس معاونوں کو گرفتار کیا۔
پولیس کی طرف سے جاری ایک بیان میں کہا گیا کہ ترال میں حالیہ جنگجو حملوں کے بعد پولیس کی ایک خصوصی ٹیم تشکیل دی گئی تھی جس نے شواہد کی بنیاد پر چار افراد کو گرفتار کیا۔پولیس نے گرفتار شدگان کی شناخت یونس نبی نائیک ولد غلام نبی نائیک،ساکنہ پنگلش ترال،فیاض احمد وانی ولد غلام محی الدین وانی ساکنہ ریشی پورہ ترال،ریاض احمد گنائی ولد محمد رمضان گنائی ساکنہ نگین پورہ ترال اور بلال احمد راتھر ولد غلام رسول راتھر ساکنہ ہفو ترال کے طور کی ہے۔
پولیس دعویٰ کے مطابق گرفتار شدگان کی پوچھ تاچھ کے بعد ترال میں فورسز پر ہوئے حالیہ حملوں کی گتھی سلجھ گئی ہے۔
پولیس نے کہا کہ جنگجوئوں کا ایک اور نیٹ ورک کھریو پانپور میں بے نقاب کیا گیا جس کے دوران جیش محمد جنگجو تنظیم کے چھ افراد کو گرفتار کیا گیا۔
پولیس نے گرفتار شدگان کی شناخت جاوید بشیر وانی ولد بشیر احمد وانی ساکنہ بابا پورہ کھریو،طاہر یوسف لون ولد محمد یوسف لون ساکنہ کھریو،رفیق احمد بٹ ولد غلام احمد ساکنہ شار شالہ کھریو ، اور عمران نذیر ولد نذیر احمد نجار ساکنہ مندکپال کھریو کے طور کی ہے۔
پولیس نے کہا کہ دونوں مقامات پر گرفتار شدگان سے بھاری تعداد میں قابل اعتراض مواد ضبط کیا گیا ہے جس میں جلا ٹین ،ڈیٹونیٹر، دھماکے تیار کرنے کا سامان اور گرینیڈ شامل ہیں۔
