کچن گارڈننگ کو فروغ دینا ترجیح میں شامل :ناظم زراعت

سرینگر//ڈائریکٹر ایگریکلچرکشمیر چودھری محمد اقبال نے پیر کو کچن گارڈن لال منڈی کا معائنہ کیا۔ ڈائریکٹر نے متعدد سبزیوں کے پودوں ،سبزیوں کے پودوں کی پرورش کے بارے میں مختلف کارروائیوں اور نشوونما پر زور دیا۔ ڈائریکٹر نے اس اسکیم کے افسران اور عہدیداروں سے بات چیت کرتے ہوئے کہا کہ ایک حکمت عملی کے تحت کچن گارڈننگ کو فروغ دینے اور وادی کشمیر میں سبزیوں کی کاشت کے تحت زیادہ سے زیادہ رقبہ کا احاطہ کرنا محکمہ کی اولین ترجیحات میں شامل ہے اور ہائی ٹیک اور صحت سے متعلق کاشتکاری کے طریقوں کی حوصلہ افزائی کی جارہی ہے۔ڈائریکٹر نے کہا کہ محکمہ زراعت نے سبزیوں کے پودوں کی محفوظ کاشت کے لئے پالی گرین ہائوس ٹیکنالوجی کو وادی میں عام کیا جارہا ہے تاکہ مقامی مارکیٹ میں مطالبات کو پورا کرنے کے لئے اس کی پیداوار میں اضافہ کیا جاسکے۔انہوں نے کہا کہ محکمہ زراعت وادی میںسبزیوں کے شعبے کو فروغ دینے کے مشن موڈ میں ہے اور اس مقصد کیلئے کاشتکاروں کو سبزیوں کی کاشت میں خود کفالت کیلئے زیادہ سے زیادہ سبزیوں کے پودے فراہم کرنا ہے۔انہوں نے کہا کہ سبزیوں کی کاشت کو تجارتی مقصد کے لئے اپنایا جاسکتا ہے کیونکہ اس میں روزگار پیدا کرنے کی عمدہ صلاحیت موجود ہے اور جدید ٹیکنالوجیز کی مدد سے کشمیر کے بے روزگار نوجوان اور سبزیوں کی کاشت کیلئے مناسب زرعی موسمی صورتحال اس شعبے کو نئی بلندیوں پر لے جاسکتی ہے۔اس موقع پر محکمہ کے سیڈ پروڈکشن آفیسر منظور احمد شاہ نے بتایا کہ کچن گارڈن اسکیم کو اپ گریڈ کیا گیا ہے تاکہ اس مخصوص سرگرمی کے لئے زیادہ سے زیادہ کاشت کاروں کی رجسٹریشن کی جاسکے۔انچارج کچن گارڈن الطاف احمد بٹ کے علاوہ ڈائریکٹر موصوف کے ساتھ محکمہ کے دیگر اعلی افسران بھی موجود تھے۔