ماہِ رمضاں

ہو گئے لمحے سہانے ماہِ رمضاں آگیا

کھل گئے رب کے خزانے ماہ ِرمضاں آگیا

غرق ہیں محوِ عبادت تشنگی کے دشت میں

صوم وتقویٰ کے دیوانے ماہِ رمضاں آگیا

فرقتوں کو مل گئے محبوب یزداں کے طفیل

وصل کے لاکھوں بہانے ماہ رمضاں آگیا

عطر سے لبریز ہیں ارض و سما کی وسعتیں

خوشبؤں کے تانے بانے ماہ رمضاں آگیا

بس درودوں کے سلاموں، فکر کے اذکار کے

چار سو ہیں شادیانے ماہ رمضاں آگیا

بخششوں کی یوں فراوانی ہے بھر دو جھولیاں

داغِ عصیاں ہے مٹانے ماہ رمضاں آگیا

ریگزاروں میں بلاتے ہیں علی شیداؔ تجھے

رحمتوں کے شامیانے ماہ رمضاں آگیا

علی شیداؔ

نجدون نیپورہ اسلام آباد،

موبائل نمبر؛9419045087

ملک و جہان کی خبروں سے رہیں اپڈیٹ