عظمیٰ نیوز سروس
جموں// جموں و کشمیر اسمبلی میں منگل کو شور و غل کے مناظر دیکھنے میں آئے جب حزب اختلاف بی جے پی ارکان نے جموں کے لیے نیشنل لا یونیورسٹی کا مطالبہ اٹھایا، جب کہ نیشنل کانفرنس اور پی ڈی پی نے مرکز کے زیر انتظام علاقے سے باہر کشمیریوں کو مبینہ طور پر ہراساں اور مار پیٹ کا سامنا ہے جو قابل قبول نہیں ہے۔سپیکر عبدالرحیم راتھر نے ہنگامہ آرائی کے باوجود وقفہ سوالات کو جاری رکھا ۔پی ڈی پی ایم ایل اے وحید الرحمان پرہ نے سپیکر کو مطلع کیا کہ انہوں نے کشمیری طلبا اور دیگر کے خلاف “نفرت انگیز جرائم” کے بڑھتے ہوئے واقعات پر بحث کے لیے تحریک التوا پیش کی ہے۔
نیشنل کانفرنس اراکین نے بھی الزام لگایا کہ یونین ٹیریٹری سے باہر رہنے والے درجنوں کشمیریوں کو ان کی رہائش گاہوں سے باہر جانے کی اجازت نہیں ہے اور وہ باہر نکلنے پر تشدد کا سامنا کر رہے ہیں جس میں حکومتی مداخلت کی ضرورت ہے۔تاہم سپیکر نے ملک میں دیگر جگہوں پر کشمیریوں کے خلاف “نفرت انگیز جرائم” کے واقعات پر بحث کے لیے پیش کی گئی تحریک التوا کو مسترد کر دیا۔انہوں نے کہا کہ تحریک التوا کا سوال ہی پیدا نہیں ہوتا کیونکہ اٹھائے گئے مسائل کو وقفہ سوالات میں خلل ڈالے بغیر مناسب طریقے سے دوسرے طریقوں سے اٹھایا جا سکتا ہے جس کا استعمال حکومت کو جوابدہ بنانے کے لیے کیا جا سکتا ہے۔انہوں نے کہا کہ جموں و کشمیر حکومت نے پہلے ہی کشمیریوں کو ہراساں کرنے کا معاملہ مختلف ریاستی حکومتوں کے ساتھ اٹھایا ہے اور ایسے ہی ایک معاملے میں حال ہی میں فوری کارروائی کرنے پر اتراکھنڈ کے وزیر اعلی کا شکریہ ادا کیا ہے۔ادھراسمبلی کی کارروائی شروع ہوتے ہی بی جے پی ایم ایل ایز نے جموں یونیورسٹی کے طلبا کا مسئلہ اٹھایا ۔انہوں نے کہا، ہم کشمیر کے لیے نیشنل لا یونیورسٹی کے خلاف نہیں بلکہ جموں کے لیے بھی ایسی ہی ایک یونیورسٹی چاہتے ہیں جو خطے کے طلبہ کی مانگ کو پورا کرے۔ بی جے پی کے دیگر ممبران نے مطالبے کی حمایت میں پلے کارڈز دکھائے اور نعرے بھی لگائے۔
