عظمیٰ نیوز سروس
سرینگر//محبوب العالم سپورٹس کے زیر اہتمام جاری چنار پریمئر لیگ کے دوسرے ایڈیشن میں جمعرات کو گروٹا کرکٹ گراؤنڈ جموں کے ٹرف سرفیس میں گروپ بی کے دو میچ کھیلے گئے۔ پول بی ہل ویو جونیئر اور اربن ووگ کنزر سے دو ٹیموں نے کوارٹر فائنل کے لیے کوالیفائی کیا۔ پول اے سے زونی مر واریرز اور ٹرائل ہنٹرز پہلے ہی کوارٹر فائنل کے لیے کوالیفائی کر چکے ہیں۔پہلا میچ رائل اسٹرائیکرز نوگام اور اربن ووگ کنزر کے درمیان کھیلا گیا۔ رائل اسٹرائیکرز نوگام نے پہلے بیٹنگ کرتے ہوئے مقررہ 20 اوورز میں 8 وکٹوں کے نقصان پر 161 رنز بنائے۔
جواب میں اربن ووگ کنزر 9 وکٹوں کے نقصان پر 154 رنز ہی بنا سکی۔ رائل اسٹرائیکرز نوگام کے ہلال تانترے نے 4 وکٹیں حاصل کیں اور مین آف دی میچ قرار پائے۔ایک اور میچ میں ہل ویو جونیئر راجوری نے علمدار واریئرز کرکٹ کلب کو 21 رنز سے شکست دی۔ ہل ویو جونیئر نے پہلے بیٹنگ کرتے ہوئے 145 رنز بنائے۔ جواب میں علمدار واریئرز صرف 124 رنز بنا سکی اور میچ ہار گئی۔ ہل ویو جونیئر کے نہال کھجوریا نے 42 رنز بنائے اور مین آف دی میچ قرار پائے۔ٹورنامنٹ کی انتظامیہ تمام ٹیموں سے درخواست کرتی ہے کہ وہ کرکٹ کے حق میں اور نوجوان ٹیلنٹ کو پروان چڑھانے کے لیے وقتاً فوقتاً حکام کی جانب سے جاری کردہ قواعد و ضوابط پر عمل کریں۔ ہم ٹیموں، ٹورنامنٹ کی نگرانی کر رہے ہیں اور ٹیموں کے کپتانوں اور مالکان کے ساتھ قریبی رابطہ کر رہے ہیں تاکہ لیگ میچز میں ڈیلیور کرنے والے کھلاڑی کو کوارٹر فائنل/سیمی فائنل یا فائنل میں نظر انداز نہ کیا جائے جو کھلاڑی کے ساتھ ناانصافی ہو گی۔ یہ دیکھا گیا ہے کہ جیسے ہی ٹیمیں کوارٹر فائنل میں پہنچتی ہیں پلیئنگ 11 کی فہرست میں بھی تبدیلی آتی ہے جو کہ صحت مندانہ عمل نہیں ہے۔
