گوجوا رہ حول سڑک کی حالت خستہ، فوری مرمت کا مطالبہ
عاقب سلام
سرینگر//شہر کے قدیم علاقے میں رہائشیوں اور مسافروں کو شدید مشکلات کا سامنا ہے کیونکہ گوجوارہ حول علمگیری بازار سڑک پر نکاسی آب کے کام کے بعد سڑک کی حالت انتہائی خراب ہو چکی ہے۔ یہ سڑک کئی ماہ قبل نکاسی آب کی تنصیب کے لیے کھودی گئی تھی، مگر اب تک اسے ہموار نہیں کیا گیا اور کئی مقامات پر زمین دھنس چکی ہے، خاص طور پر اسلامیہ کالج اور حول کے علاقوں میں۔مسافروں کے مطابق حالیہ ہفتوں میں وقفے وقفے سے ہونے والی بارشوں اور اب مسلسل بارش نے سڑک کی حالت کو مزید خراب کر دیا ہے۔ کیچڑ، پانی جمع ہونے اور گہرے گڑھوں کی وجہ سے سفر خطرناک بن گیا ہے، خاص طور پر دو پہیہ گاڑیوں اور ای رکشہ کے لیے۔ایک مقامی مسافر اشفاق نے بتایا،’’سڑک کا ایک پورا حصہ تقریباً ناقابلِ استعمال ہو چکا ہے۔ گاڑیاں اس سے گریز کرتی ہیں جس کی وجہ سے باقی حصے پر ٹریفک کا شدید دباؤ ہے۔ روزانہ کا سفر ایک ڈراؤنا خواب بن چکا ہے۔‘‘موٹر سواروں کا کہنا ہے کہ غیر ہموار سطح اور اچانک گڑھوں کی وجہ سے ان کی گاڑیوں کو نقصان پہنچ رہا ہے۔ ایک مسافر نے کہا، ’’ہماری گاڑیاں روزانہ متاثر ہو رہی ہیں۔ مسلسل جھٹکوں کی وجہ سے سسپنشن خراب ہو رہی ہے، جس سے اخراجات بڑھ رہے ہیں۔‘‘یہ سڑک کئی تعلیمی اداروں کے لیے ایک اہم راستہ ہے اورسکمزصورہ جانے والی ایمرجنسی سروسز کے لیے بھی نہایت ضروری ہے۔ مقامی لوگوں کا کہنا ہے کہ ٹریفک جام کی وجہ سے ایمبولینسیں اکثر پھنس جاتی ہیں۔حول کے ایک رہائشی نے کہا،’’یہ سڑک ایمرجنسی نقل و حرکت کے لیے انتہائی اہم ہے۔ یہاں کسی بھی تاخیر کے خطرناک نتائج ہو سکتے ہیں۔‘‘یہ مسئلہ صرف اسی سڑک تک محدود نہیں بلکہ حبہ کدل مائسمہ روڈ پر بھی نکاسی آب کے کام کے بعد سڑک کی حالت خراب ہے اور چلنا مشکل ہو گیا ہے۔ مقامی افراد کے مطابق طویل عرصے سے مرمت کا کوئی مؤثر کام نہیں کیا گیا۔مسافروں کا کہنا ہے کہ ای رکشہ ڈرائیور اور دو پہیہ گاڑی چلانے والے سب سے زیادہ متاثر ہو رہے ہیں۔ ایک ای رکشہ ڈرائیور فیروز احمد نے کہا، ’’چھوٹے گڑھے بھی ای رکشہ کا توازن بگاڑ دیتے ہیں، کئی بار گاڑیاں الٹنے کے قریب پہنچ چکی ہیں۔‘‘مقامی لوگوں نے حکام سے مطالبہ کیا ہے کہ مرمتی کام کو جلد از جلد مکمل کیا جائے اور سڑک کو قابلِ آمدورفت بنایا جائے۔ ایک اور رہائشی نے کہا، ’’نکاسی آب کا کام مکمل ہو چکا ہے لیکن سڑک کو اسی حالت میں چھوڑ دیا گیا ہے، حکام کو فوری اقدام کرنا چاہیے۔‘‘دوسری جانب حکام کا کہنا ہے کہ موسم بہتر ہوتے ہی سڑکوں کی مرمت اور بلیک ٹاپنگ کا کام شروع کیا جائے گا۔ ایک افسر نے بتایا، ’’گرمیوں کے آغاز کے ساتھ ہی شہر کے قدیم علاقوں میں ایسی تمام سڑکوں کی بحالی کو ترجیح دی جائے گی۔‘‘
