ایل جی کی نیٹ ورک کو ختم کرنے کیلئے بھرپور مہم چلانے کی ہدایت
جموں// لیفٹیننٹ گورنر منوج سنہا نے جمعرات کو’ نشا مکت جموں کشمیر ابھیان‘ کے تحت آنے والی 100 روزہ سخت مہم کی تیاریوں کا جائزہ لینے کیلئے ایک اعلیٰ سطحی میٹنگ کی صدارت کی۔راج بھون ترجمان نے کہا کہ مہم، جس کا مقصد مرکز کے زیر انتظام علاقے سے منشیات کے استعمال کو ختم کرنا ہے، کو بیداری کے پروگراموں کی ایک سیریز کے ذریعے منعقد کیا جائے گا۔ایل جی 11 اپریل کو جموں کے ایم اے سٹیڈیم سے ایک میگا “پد یاترا” کو جھنڈی دکھائیں گے، اس کے بعد مئی کے پہلے ہفتے کے دوران سرینگر میں بھی اسی طرح کے بڑے پیمانے پر مہم شروع کی جائیگی۔
نیز، ایل جی کٹھوعہ اور راجوری میں پدیاترا میں شرکت کریں گے۔ایل جی نے کہا “یو ٹی میں منشیات کی آمد جموں اور کشمیر کے نوجوانوں کے مستقبل کو خطرے میں ڈالنے کی ایک بڑی بین الاقوامی سازش کا حصہ ہے۔ معاشرے کے ہر طبقے کو منشیات کی لعنت کے خلاف اس لڑائی میں شامل ہونا چاہیے،” ۔انہوں نے منشیات کی سمگلنگ کے نیٹ ورک کو ختم کرنے کے لیے مسلسل اور بھرپور مہم چلانے کی ہدایت کی۔انہوں نے کہا کہ “معصوم کو ہاتھ نہ لگائیں اور مجرم کو نہ چھوڑیں، ہماری پالیسی ہے‘‘۔میٹنگ میں منصوبہ بند سرگرمیوں کے سلسلے اور نشا مکت ابھیان کے لیے تیار کردہ محکمانہ سرگرمی کیلنڈر پر بھی تبادلہ خیال کیا گیا۔یوٹی اور ڈویژنل سطح کی کمیٹیاںمعلومات، تعلیم، اور مواصلات مہم اور ایکشن پلان کے نفاذ کے لیے تشکیل دی گئی ہیں۔ایل جی نے مہم کو جن آندولن بنانے کی ہدایت کی۔ انہوں نے مہم کو مزید مثبت بنانے کے لیے رائے کے ساتھ عوامی تجاویز کے انضمام پر بھی زور دیا۔انہوں نے کہا”عام لوگوں کو بھی منشیات کے استعمال کے کیسوں کی اطلاع دینے کی ترغیب دی جانی چاہیے،” ۔
