سید امجد شاہ
جموں// ملی ٹینٹوں کی طرف سے کشمیر میں خدمات انجام دینے والے پی ایم پیکیج ملازمین کو ان کی پوسٹنگ کی تفصیلات اور ناموں کے ساتھ فہرست جاری کرنے سے کشمیری پنڈتوں میں خوف وہراس پھیل گیا ہے۔پہلے ہی مہاجر کشمیری پنڈت جموں میں آل مائیگرنٹس ایمپلائیز ایسوسی ایشن کشمیر کے بینر تلے احتجاج کر رہے تھے اور سیکورٹی وجوہات کی بناء پر کشمیر سے جموں منتقلی کا مطالبہ کر رہے تھے۔تازہ دھمکی نے ان میں خوف و ہراس پیدا کر دیا ہے اور انہوں نے اپنے احتجاج کو تیز کرنے کی دھمکی دی ہے۔جموں میں پی ایم پیکیج کے ملازمین کی نمائندگی کرنے والے ایسوسی ایشن کے سینئر عہدیدار نے کہا”جب راہول بھٹ مارا گیا تھا، حکومت نے ایک خصوصی تحقیقاتی ٹیم (SIT) تشکیل دی تھی لیکن اس کی رپورٹ کا ابھی تک انتظار ہے۔ یہ حکومت اور سیکورٹی فورسز پر منحصر ہے کہ وہ کشمیر میں کشمیری پنڈتوں کی حفاظت کو یقینی بنائیں اور ساتھ ہی اس خطرے کے پیچھے لوگوں کو بے نقاب کرنے کی تحقیقات کریں “۔ٹارگٹ کلنگ کے بعد کشمیر سے واپس آنے والے اور کینال روڈ کے قریب احتجاجی مظاہروں میں مسلسل حصہ لینے والے سرکاری ٹیچر نے کہا ’’جو لوگ کشمیر واپس لوٹے ہیں اور کچھ مجبوریوں یعنی مالی، اپنے طلبہ کی وجہ سے اپنی ڈیوٹی میں شامل ہوئے ہیں ان کے لیے حالات ٹھیک نہیں ہیں‘‘۔انہوںنے کہا کہ پی ایم پیکیج کے تقریباً 95 فیصد ملازمین کو ستمبر/اکتوبر 2022 کے بعد سے تنخواہیں نہیں ملی ہیں۔ اب تک صرف 5 فیصد پی ایم پیکیج ملازمین کی تنخواہیں جاری کی گئی ہیں ۔ایک اور احتجاج کرنے والے پی ایم پیکیج ملازم نے بتایا کہ “کشمیری پنڈت ملازمین کی اکثریت جموں واپس آگئی ہے اور وہ اپنی نقل مکانی کے لیے احتجاج کر رہے ہیں تاہم ان کا مطالبہ ابھی پورا ہونا باقی ہے‘‘۔انہوں نے کہا کہ ہم ملی ٹینٹ گروپوں کی دھمکیوں کی فہرست میں ہیں اور حکومت کو پی ایم پیکیج ملازمین کی فہرست کے اجراء کا خیال رکھنا چاہیے۔ متعلقہ ڈی ڈی اوز ہمیں ڈیوٹی جوائن کرنے پر مجبور کر رہے تھے اور پھر انہوں نے ہماری تنخواہیں جاری کرنا بند کر دیں۔قابل ذکر بات یہ ہے کہ “ملی ٹینٹ گرد گروپ” نے پی ایم پیکیج کے ملازمین کی ایک فہرست جاری کی ہے جس میں انہیں مہاجر کشمیری پنڈت اور دوسروں کو غیر مقامی بتایا گیا ہے جبکہ ملازمتوں اور فلیٹس کا حوالہ دیتے ہوئے مقامات کی تعداد کا انکشاف کیا گیا ہے۔کشمیر میں ٹارگٹ کلنگ کے پیش نظر جموں میں مقیم ریزروڈ کیٹیگری ایس سی ملازمین بھی اپنے ہم منصب کشمیری پنڈتوں کی طرح واپس آئے اور احتجاجی مظاہرے کئے۔ وہ کشمیر میں سیکورٹی کی صورتحال بہتر ہونے تک جموں منتقل کرنے کا مطالبہ کرتے ہوئے احتجاج بھی کر رہے تھے۔
