مزید خبرں

عاصف بٹ

کشتواڑ//ضلع کشتواڑ میں انتظامیہ کی جانب سے لگائے گئے کورونا کرفیو کے سبب ضلع بھر میں عام زندگی بری طرح مفلوج ہوکررہ گئی ہے جبکہ آج بھی پولیس نے قصبہ کے ساتھ ساتھ دیہات میں بھی سخت بندشیں عائد کیں۔ اگرچہ بازاروں میں صبح نرمی برتنے کے ساتھ ہی لوگوں کی بھاری بھیڑ دیکھنے کو ملی تاہم اسکے بعد بھی بازاروں میں لوگوں کی بھاری بھیڑ دیکھی جارہی تھی جسکے بعد پولیس نے اب مزید سختی برتنی شروع کی جس دوران کئی افراد کے چالان کئے گئے۔ آج بھی سبزی، پھل مرغ،گوشت، بیکری و دودھ کی دوکانوں کو دس بجے تک کھولنے کی اجازت تھی تاہم ڈھیل ختم ہوتے ہی پولیس نے سختی کرتے ہوئے کی مقامات پر خاردار تاریں بچھائیں اور لوگوں کے چلنے پر قدغن لگائی جبکہ گاڑیوں کو پوچھ تاچھ کے بعد چلنے کی اجازت دی جانے لگی۔قصبہ میں آج بھی ادویات کی دکانیں دن بھر کھلی رہیں جبکہ دیگر دوکانیں ، تجاراتی مراکز ،ٹرانسپورٹ مکمل بند رہا ۔قصبہ کے ساتھ ضلع کے دیگر علاقہ جات میں بھی کرونا کرفیو مسلسل جاری ہے۔ کشتواڑ کے چھاترو ، مغل میدان، پاڈر ، ٹھکرائی ، درابشالہ ، بونجواہ و دیگر علاقوں میں بھی کرونا کرفیو کا نفاد عمل میں لایا گیاتھا جس دوران تمام تر تجارتی مراکز دس بجے کے بعد بند رہے۔ تفصیلات کے مطابق دیہات میں بھی پولیس کی  جانب سے سختی برتی جارہی ہے اور بلاجواز گھومنے والوں پر سختی کی جارہی ہے تاکہ اس وبائی بیماری پر قابو پائا جاسکے۔وہیں ضلع انتظامیہ نے اب بلاجوز باہر نکلنے والوں پر مزید سختی عمل میں لائی اور اب ضلع میں  میڈیکل ایمرجنسی و دیگر کسی قسم کی ایمرجنسی کیلئے کرفیو پاس کی ضرورت ہوگی۔جاری کئے گئے ایک پریس ریلیز کے مطابق کرفیو پاس صرف میڈیکل ایمرجنسی و دیگر کسی ایمرجنسی کیلئے تمام طرح کے لوازمات مکمل کرنے کے بعد ہی آن لاین جاری کئے جائیںگے جبکہ عوام سے اپیل کی گئی کہ وہ پاس بنانے کیلئے کسی دفتر کا رخ نہ کریں بلکہ آن لاین ہی پاس جاری کیا جائے گا۔وہیں ضلع میں آئے روز کورونا کے مثبت معاملات سامنے آرہے ہیں جسکے بعد انتظامیہ نے مزید بندشیں عائد کی ہیں۔ اب کورونا وائرس کے مثبت معاملات دورافتادہ علاقہ جات میں بھی سامنے آرہے ہیں ۔جہاں مڑواہ سے بھی ابھی تک 9 معاملے سامنے آئے ہیں جبکہ سب ڈویژن چھاترو کے بھی کئی علاقوں کا مائیکرو کنٹینمنٹ زون قرار دیا گیاہے اور لوگوں سے انتظامیہ نے بلاجواز گھروں سے باہر نہ نکلنے کی تلقین کی ہے۔

 

 

ادھم پور //ضلع مجسٹریٹ ادھم پور اندھو کنول چب کا کہنا ہے کہ کورونا وائرس کی تیسری لہر بہت خطرناک ہوگی اور یہاں تک کہ چھوٹے بچے بھی اس وبا کی لپیٹ میں آ جائیں گے ۔انہوں نے کہا کہ بلیک فنگس بھی خطرناک بیماری ہے جس کی وجہ سے انسانی اعضا بالخصوص آنکھیں بری طرح متاثر ہو رہی ہیں۔اندھو کنول چب نے جمعرات کو لوگوں سے کورونا ایس او پیز پر سختی سے عمل کرنے کی اپیل کرتے ہوئے کہا’’تیسری لہر چھوٹے بچوں کو متاثر کرے گی۔ یعنی گھر میں جو سب سے چھوٹا بچہ ہوگا وہ بھی کووڈ کی لپیٹ میں آ جائے گا‘‘۔انہوں نے کہا’’ہمیں بتایا گیا ہے کہ بلیک فنگس نامی چیز بھی آنے والی ہے ۔ بلیک فنگس لگنے سے آنکھیں متاثر ہوں گی۔ آنکھیں کی سرجری کرانی پڑے گی یا کیا پتہ آنکھیں ہی نکالنی پڑے ۔ ناک والے حصے پر بھی سرجری کی ضرورت پڑ سکتی ہے ‘‘۔ان کا مزید کہنا تھا’’یہ باتیں میں اس لئے بتا رہی ہوں کیوں کہ ہم لوگوں کو یہ سمجھنا پڑے گا کہ اب صورتحال دن بہ دن بد سے بدتر ہو جائے گی اگر ہم اپنے آپ کو کنٹرول نہیں کریں گے ‘‘۔

 

محمد تسکین

بانہال// جمعرات کے روز ضلع رام بن میں کووڈ انیس سے متاثرہ 201 آفراد کے نمونے مثبت آئے ہیں جو اب تک کی ایک دن میں سب سے زیادہ تعداد ہے۔ ضلع رام بن میں 20 مئی جمعرات شام تک 201 تازہ افراد کے کووڈ نمونے مثبت آنے کے بعد ضلع رام بن میں مثبت کیسوں کی کل تعداد 4108 تک پہنچ گئی ہے جبکہ رام بن ٹراما ہسپتال ، جو اب کووڈ کئیر ہسپتال ہے ، میں 13 کووڈ مریض زیر علاج ہیں۔ اب تک 3134 کووڈ مریض شفایاب ہوئے ہیں جبکہ ایکٹیو پازیٹیو کیسوں کی تعداد 1130 تک پہنچ گئی ہے۔ بڑے پیمانے پر کی جارہی ٹیسٹنگ کے نتیجے میں ضلع رام بن میں کووڈانیس سے متاثر مثبت کیسوں میں مسلسل اضافہ ہورہا ہے اور اب تک پنتالیس افراد کووڈ:

 انیس کا شکار ہوکر لقمہ اجل بنے ہیں جن میں سے چوبیس اموات رواں سال کی مارچ سے اب تک کووڈانیس کی وجہ سے واقع ہوئی ہیں۔ 

 

ریاسی//اپنی پارٹی نائب صدر اور سابقہ وزیر اعجاز احمد خان نے کویڈ19معاملات میں تیزی کے ساتھ اضافہ کو دیکھتے ہوئے دیہات میں حفظان ِ صحت نظام کو مستحکم کرنے کی غرض سے اپنے ضلع ترقیاتی کونسل فنڈز سے10لاکھ روپے استعمال کرنے کو منظوری دی ہے۔ اعجاز احمد خان نے کہا ہے کہ وہ دیہی علاقہ جات میں صحت نظام کو مستحکم کرنے کی حکومتی کوششوں میں اپنا تعاون کرنا چاہتے ہیں جس کی اس وقت ضرورت ہے۔انہوں نے کہاکہ ’’میں نے ڈپٹی کمشنر ریاسی سے بات کی اور اُن سے گذارش کی ہے کہ میرے ڈی ڈی سی فنڈ میں سے 10لاکھ روپے دیہی علاقہ کے اندر صحت نظام بہتر بنانے پر خرچ کئے جائیں‘‘۔ انہوں نے جموں وکشمیر کی ہرپنچایت میں5بستروں پر مشتمل کویڈ کیئر سینٹر قائم کرنے کے لئے ڈپٹی کمشنروں اور صحت محکمہ کو ہدایات جاری کرنے کے لئے لیفٹیننٹ گورنر منوج سنہا کی تعریف کی ہے کیونکہ متعدد افراد کے لئے اپنے ہی گھر میں کویڈ متاثرہ مریضوں کو اعلیحدہ رکھنے کا آپشن نہیں۔ انہوں نے کہاکہ حکومت نے صحت نظام کو بہتربنانے کے لئے اچھا قدم اُٹھایا ہے۔ انہوں نے ہاکہ گاؤں میں لوگ احتیاط بھی برت رہے ہیں اور ویکسین بھی لے رہے ہیں، ہمیں کورونا متاثر مریضوں کے لئے حساس حفظان انتظامات کرنے چاہئے۔ یہ کوئی ڈھکی چھپی بات نہیں کہ دیہات کے اندر غیر مناسب صحت نظام ہے۔ انہوں نے کہاکہ ریاسی، سب ڈویژن مہور، دھرماڑی اور گول میں حکومت کی فوری توجہ درکار ہے۔ کسی بھی قیمت پر حکومت صحت شعبہ میں خالی پڑی اسامیاں پر کرے ، حکومت کو چاہئے کہ صحت ملازین کو دیہات کے ا ندر خدمات انجام دینے کے عوض اضافی مراعات دی جائیں اور آئی ایس ایم ڈاکٹروں کی خدمات بھی حاصل کی جائیں۔ اِن ڈاکٹروں کو ویلنس سینٹرز اور پی ایچ سی میں تعینات کیاجائے۔

 

 

اشتیاق ملک

ڈوڈہ //ڈوڈہ ضلع میں کورونا وائرس سے متاثرہ افراد کی تعداد میں بتدریج اضافہ ہو رہا ہے۔ جمعرات کو ڈوڈہ، بھدرواہ، عسر ،ٹھاٹھری و گندوہ ہوئی کوؤڈ جانچ کے دوران 79 نئے مثبت معاملات سامنے آئے ہیں اور 25 مریض صحتیاب ہوئے ہیں جبکہ پچھلے چوبیس گھنٹوں میں 4 اموات ہوئیں ہیں. اطلاعات کے مطابق 38 مریضوں کو ہسپتال آئسو لیشن و باقی افراد کو خانہ قرنطینہ میں رکھا گیا ہے۔ ضلع میں فعال کیسوں کی تعداد 1063 و شفایاب ہوئے مریضوں کی مجموعی تعداد 3833 پہنچ گئی ہے۔ اس دوران بدھ کی شام بھدرواہ ڈنڈی کی 80 سالہ خاتون کی گورنمنٹ میڈیکل کالج ڈوڈہ میں موت ہوئی وہیں بدھ و جمعرات کی درمیانی شب کو بھدرواہ پونیجہ گاؤں کے اسی سال بزرگ کی ایس ڈی ایچ بھدرواہ سے گورنمنٹ میڈیکل ڈوڈہ منتقلی کے دوران راستے میں ہی وفات ہوئی۔ جمعرات کو کاہرہ جوڑا و عسر کی پنتیس و بیس سالہ دو خواتین گورنمنٹ میڈیکل کالج ڈوڈہ میں وفات پا گئیں۔ اس اسطرح سے پچھلے چوبیس گھنٹوں میں کورونا وائرس سے تین خواتین سمیت چار ہلاکتیں ہوئیں ہیں۔اس دوران انتظامیہ نے ضلع میں ویکسینیشن عمل میں تیزی لائی ہے اور 34 مراکز پر ٹیکہ لگائے جارہے ہیں۔ سرکاری اعداد و شمار کے مطابق اب تک ضلع میں 91 ہزار سے زائد افراد کو ٹیکے لگائے جا چکے ہیں۔