محکمہ صحت کسی بھی چیلنج سے نمٹنے کیلئے تیار

  جموں//لیفٹیننٹ گورنر کے مشیر بصیر احمد خان نے  یہا ں ایک میٹنگ کے دوران کووِڈ۔19سے نمٹنے کے لئے مختلف محکموں کی جانب سے جاری کوششوں کا جائزہ لیا۔ڈویژنل کمشنر کشمیر ، کشمیر صوبے کے تمام ڈپٹی کمشنروں ، ڈائریکٹر سکمز ، پرنسپل جی ایم سی سری نگر ، ناظم صحت کشمیر ، ایم ڈی میڈیکل سپلائز کارپوریشن ، پرنسپل میڈیکل کالج بمنہ اور دیگر افسران نے ویڈیو کانفرنسنگ کے ذریعے میٹنگ میں شرکت کی۔میٹنگ کے دوران سبھی افسران نے کووِڈ سے نمٹنے کے لئے جاری کوششوں اور سرگرمیوں کی تفصیلی جانکاری دی ۔ مشیر کو بتایا گیا کہ سکمز صورہ اور دیگر ہسپتالوں میں سرطان کے مریضوں کو روزانہ 50کیمو تھراپیز دی جارہی ہیں ۔انہیں بتایا گیا کہ ان بیماروں کو ضروری ادویات بھی دی جارہی ہے ۔ میٹنگ میں یہ بھی بتایا گیا کہ حاملہ خواتین کو لاک ڈاون کے دوران طبی سہولیات فراہم کرنے پر خاص توجہ دی جارہی ہے۔بصیر احمد خان نے سری نگر ، بانڈی پورہ ، اننت ناگ اور شوپیاں میں لاک ڈاون کی بندشیں سختی سے عائد کرنے کی ہدایت دی ۔ انہوںنے کہاکہ اس وَبا کو پھیلنے سے روکنے میں ہر کسی کا ایک رول بنتا ہے ۔اُنہوں نے لوگوں سے اپیل کی کہ وہ انتظامیہ کو اپنا بھر پور تعاون دیں تاکہ وائرس کے پھیلائو کو روکا جاسکے۔مشیر موصوف نے ڈپٹی کمشنروں کو ہدایت دی کہ وہ اپنے اپنے متعلقہ اضلاع میں کسی بھی ہنگامی صورتحال سے نمٹنے کے لئے ڈاکٹروں ، نرسوں اور دیگر نیم طبی عملے کی دستیابی یقینی بنائیں ۔اُنہوں نے ڈپٹی کمشنروں کو یہ ہدایات بھی دیں کہ وہ لوگوں کو ضروری سہولیات کی فراہمی کے ساتھ ساتھ راشن کی دستیابی بھی یقینی بنائیں ۔ میٹنگ میں بتایا گیا کہ مختلف اضلاع میں چھاتی کے امراض میںمبتلا اَفراد کی طبی جانچ کی جارہی ہے اور مشتبہ افراد کے سمپل لئے جارہے ہیں۔میٹنگ میں ماسک ، پی پی ای ، وی ٹی ایم اور دیگر ضروری سازو سامان کی دستیابی کابھی جائزہ لیا گیا۔میٹنگ میں بتایا گیا کہ مجموعی صورتحال قابو میں ہے اور محکمہ صحت کسی بھی صورتحال سے نمٹنے کے لئے تیار ہے۔مشیر موصوف نے کہا کہ تمام ڈپٹی کمشنروں کو پنچوں ، سرپنچوں ، شہری بلدیاتی اداروں کے ملازمین اور تحصیلداروں کے ساتھ مل کر کام کرنا چاہیئے ۔ مشیر نے لوگوں میں مسلسل بنیادوں پر جانکاری عا م کرنے کے لئے کہا۔کشمیر صوبے کے تمام اضلاع کے ڈپٹی کمشنروں نے مختلف علاقوں میں کیمکلز کا چھڑکائو کرنے کے بارے میں بھی تفصیلی جانکاری دی۔