یواین آئی
نئی دہلی// نوجوانوں، خواتین اور طلباء کے درمیان منشیات سے پاک ہندوستان مہم کو مؤثر طریقے سے چلانے کے لیے سماجی انصاف اور بااختیار بنانے کی مرکزی وزارت اور انٹرنیشنل سوسائٹی کرشنا کانشیسنیس (اسکون) کے درمیان ایک مفاہمت نامے پر دستخط کیے گئے ہیں۔سماجی انصاف اور بااختیار بنانے کے مرکزی وزیر ڈاکٹر وریندر کمار نے جمعرات کو یہاں دستخطی تقریب سے خطاب کرتے ہوئے کہا کہ مہم کے تحت مختلف سرگرمیاں انجام دینے کے لیے مذہبی اور روحانی تنظیموں کے ساتھ تعاون سے ہندوستان کو منشیات کے خلاف حساس بنانے میں مدد ملے گی۔ انہوں نے کہا کہ اسکون کے ساتھ اس مفاہمت نامے سے نوجوانوں، خواتین، طلباء وغیرہ میں منشیات سے پاک بھارت مہم کے پیغام کو پھیلانے میں مدد ملے گی۔ انہوں نے اسکون سے کہا کہ وہ اپنے تمام جلسوں اور اجتماعات میں اس مہم کی تشہیر کرے۔مرکزی وزیر نے کہا کہ وزارت پورے ملک میں 550 سے زیادہ رضاکارانہ تنظیموں کے ذریعے مناسب علاج، فروغ، معاشرے تک پہنچنے اور انہیں بیدار کرنے کے لیے مسلسل پروگرام چلا رہی ہے۔ڈاکٹر کمار نے کہا کہ وزارت نے نوچیتنا ماڈیول تیار کیا ہے، جس سے اسکولی طلباء میں زندگی کی مہارتوں اور منشیات کے استعمال کے بارے میں بیداری اور تعلیم میں اضافہ ہوگا۔ اس پروجیکٹ کا بنیادی مقصد اسکول کے بچوں میں منشیات کے استعمال کو نہ صرف سست کرنا ہے بلکہ اسے ہمیشہ کے لیے روکنا بھی ہے۔ مزید برآں نوچیتن پر تربیتی مواد کا 12 علاقائی زبانوں میں ترجمہ کیا جا رہا ہے۔ اساتذہ کی مدد کے لیے ہر ماڈیول دکشا پورٹل پر آن لائن اپ لوڈ کے لیے بھی دستیاب ہوگا۔
