یواین آئی
نئی دہلی// حکومت نے ہندوستانی موبائل نمبر دکھا کر بین الاقوامی جعلی کالوں کو روکنے کی ہدایات دی ہیں۔ یہاں جاری ایک بیان میں وزارت مواصلات نے کہا کہ اطلاعات موصول ہو رہی ہیں کہ جعلساز ہندوستانی موبائل نمبر دکھا کرہندوستانی شہریوں کو بین الاقوامی جعلی کالیں کر رہے ہیں اور سائبر کرائمز اور مالی فراڈ کر رہے ہیں۔ بظاہر یہ کالیں ہندوستان کے اندر سے کی جا رہی ہیں، لیکن کالنگ لائن آئیڈینٹیٹی (سی ایل آئی) سے ہیرا پھیری کے ذریعے بیرون ملک سے سائبر مجرموں کے ذریعے کی جا رہی ہیں۔ جعلی ڈیجیٹل گرفتاریوں، فیڈایکس گھپلوں، کوریئرز میں منشیات/نشہ آور اشیاء ، حکومت اور پولیس حکام کی نقالی اور حکام کے ذریعے موبائل نمبر منقطع کرنے وغیرہ کے حالیہ واقعات میں ایسی بین الاقوامی جعلی کالوں کا غلط استعمال کیا گیا ہے۔وزارت کے مطابق ڈپارٹمنٹ آف ٹیلی کمیونیکیشن (ڈی او ٹی) اور ٹیلی کام سروس پرووائیڈرز (ٹی ایس پی) نے اس لیے ایسی آنے والی بین الاقوامی جعلی کالوں کی شناخت کرنے اور انہیں کسی بھی ہندوستانی ٹیلی کام صارف تک پہنچنے سے روکنے کے لیے ایک نظام وضع کیا ہے۔ اب ٹی ایس پیز کو ایسی آنے والی بین الاقوامی جعلی کالز کو بلاک کرنے کی ہدایات جاری کر دی گئی ہیں۔ٹیلی کمیونیکیشن ڈپارٹمنٹ کی طرف سے جاری کردہ ہدایات کے مطابق ہندوستانی لینڈ لائن نمبروں سے شروع ہونے والی بین الاقوامی دھوکہ دہی والی کالوں کو پہلے ہی ٹی ایس پی کے ذریعے بلاک کیا جا رہا ہے۔
