یو این آئی
میکسیکو سٹی/فیفا ورلڈ کپ 2026ء کے آغاز سے قبل یورپی چیمپئن اسپین کے لیے ایک بہت بڑی اور مثبت خبر سامنے آئی ہے ۔ بارسلونا کے نوجوان اسٹار فٹ بالر لیمین یمال اور ان کے ساتھی ونگر نیکو ولیمز انجری سے چھٹکارا پانے کے بعد کیپ ورڈی کے خلاف 15 جون کو ہونے والے اسپین کے افتتاحی میچ کے لیے دستیاب ہوں گے ۔اسپین کے ہیڈ کوچ لوئس ڈی لا فونٹے نے اتوار کے روز اس بات کی باقاعدہ تصدیق کی ہے ، جس سے ہسپانوی کیمپ میں خوشی کی لہر دوڑ گئی ہے ۔لامین یمال اور ایتھلیٹک بلباؤ سے تعلق رکھنے والے نیکو ولیمز دونوں ہی ہیمسٹرنگ کی چوٹ کے باعث کلب سیزن کے آخری میچز نہیں کھیل سکے تھے ۔ ورلڈ کپ جیسے بڑے اسٹیج پر ان دونوں جارحانہ ونگرز کی واپسی یورپی چیمپئنز کے لیے ایک بہت بڑا بوسٹر ثابت ہوگی۔ان کے علاوہ اوساسونا کے ونگر وکٹر مونیوز کے بھی اٹلانٹا میں ہونے والے پہلے میچ تک مکمل فٹ ہونے کی امید ہے ۔ان تینوں اہم کھلاڑیوں نے پیر کے روز پیرو کے خلاف میکسیکو میں ہونے والے وارم اپ (دوستانہ) میچ کے لیے ٹیم کے ساتھ سفر نہیں کیا، بلکہ وہ امریکہ میں ہی قائم اسپین کے تربیتی کیمپ میں موجود رہے ۔پہلا میچ: 15 جون بمقابلہ کیپ ورڈی (اٹلانٹا)دوسرا میچ: بمقابلہ سعودی عرب (اٹلانٹا) تیسرا میچ: بمقابلہ یوراگوئے (گواڈالاجارا، میکسیکو)
