سمت بھارگو +رمیش کیسر
راجوری//لائن آف کنٹرول (ایل او سی) کے پار منشیات کی اسمگلنگ کی تحقیقات میں ایک بڑی پیشرفت کے طور پر پولیس نے اسمگلنگ میں ملوث سرغنہ کو گرفتار کر لیا اور تازہ چھاپے میں چھ کلو گرام ہیروئن نما منشیات برآمد کر لی۔گرفتار مرکزی ملزم پہلے سے درج منشیات اسمگلنگ کیس میں مطلوب تھا، جو 17 دسمبر گزشتہ سال درج کیا گیا تھا۔پولیس نے اپنے سرکاری بیان میں کہا کہ اس نے منشیات کی اسمگلنگ کے خلاف بڑی کامیابی حاصل کی ہے اور مرکزی ملزم کو گرفتار کر لیا ہے جو کہ پولیس اسٹیشن نوشہرہ میں درج ایف آئی آر 178/2024 میں مطلوب تھا۔پولیس کے مطابق، اس کیس کے سلسلے میں مزید چھ کلو گرام ہیروئن نما منشیات برآمد کی گئی ہیں۔ یہ کیس این ڈی پی ایس ایکٹ کی دفعات 8/21/22/29 کے تحت 17 دسمبر 2024 کو پولیس اسٹیشن نوشہرہ میں درج کیا گیا تھا۔یہ کیس اس وقت درج کیا گیا تھا جب دو ملزمان کو 5.3 کلو گرام ہیروئن نما منشیات کے ساتھ گرفتار کیا گیا تھا۔ گرفتار شدہ افراد میں سجن کمار عرف وکی اور سوباش چندر شامل تھے۔پولیس نے کہا کہ اس کیس کی تفتیش کے دوران اہم شواہد سامنے آئے، اور مسلسل کوششوں کے بعد مرکزی ملزم اور سرغنہ جسوندر کمار عرف سونو ولد مرحوم کرم چند، ساکن لمبیڑی نوشہرہ کو شناخت کر کے گرفتار کر لیا گیا۔سرغنہ کو پولیس نے 5 فروری 2025 کو گرفتار کیا۔ وہ ایک اور کیس میں بھی مطلوب تھا جو پولیس اسٹیشن نوشہرہ میں ایف آئی آر نمبر 36/2024 کے تحت درج تھا اور ایک سال سے مفرور تھا۔حالیہ گرفتاری کے بعد پوچھ تاچھ کے دوران، پولیس کے مطابق، جسوندر کمار عرف سونو نے انکشاف کیا کہ وہ پاکستان میں مقیم منشیات کے اسمگلروں سے ہیروئن حاصل کر رہا تھا۔ اس کے ساتھ اس کے ساتھی اشوک کمار اور سنجے کمار، دونوں سیر گاؤں کے رہائشی (بھوانی پولیس پوسٹ، نوشہرہ تھانہ کے تحت) شامل تھے۔پولیس نے دونوں کو گرفتار کر لیا گیا ہے اور تفتیش کے دوران انہوں نے اسمگل شدہ ہیروئن رکھنے کا اعتراف کیا ہے۔ پولیس نے مزید کہا کہ ان کے انکشاف پر 12 پیکٹوں میں موجود 6 کلو گرام ہیروئن نما منشیات برآمد کی گئی ہیں۔جموں و کشمیر پولیس نے کہا کہ یہ برآمدگی راجوری میں منشیات کے خلاف جاری جنگ میں ایک بڑی کامیابی ہے۔پولیس نے مزید کہا کہ راجوری پولیس منشیات کے خاتمے کے لئے پرعزم ہے اور اس میں ملوث افراد کے خلاف سخت قانونی کارروائی کو یقینی بنائے گی۔مزید تفتیش جاری ہے تاکہ اس نیٹ ورک سے جڑے دیگر افراد کی شناخت اور گرفتاری ممکن ہو سکے۔
