جموں//گورنر کے مشیر خورشید احمد گنائی نے زنانہ پی جی کالج گاندھی نگر میں جے اینڈ کے وومن سائنس کانگریس کے چھٹے شمارے کا آغاز کیا۔ اس تین روزہ پروگرام کا انعقاد گورنمنٹ کالج فار وومن گاندھی نگر نے جے اینڈ کے سٹیٹ سائنس اینڈ ٹیکنالوجی کونسل کے اشتراک سے کیا ہے۔ دیگر لوگوںکے علاوہ وائس چانسلر کلسٹر یونیورسٹی آف جموں پروفیسرانجو بھسین ، پرنسپل جی سی ڈبلیو گاندھی نگر ڈاکٹر کوشل سموترا اور کئی دیگراہم شخصیات بھی موجود تھیں۔اس موقعہ پر خورشید احمد گنائی نے منتظمین کی کوششوں کی ستائش کرتے ہوئے کہا کہ اس طرح کے اقدامات خواتین میں سائنسی اور تحقیقی جذبے کو اُجاگر کرنے اور ان میں قائدانہ صلاحیتیں اُبھارنے میں مددگار ثابت ہوتے ہیں۔اُنہوں نے امید ظاہر کی کہ ملک میں لڑکیوں کے لئے سائنسی مضمون میں کافی وسائل موجو د ہیں۔ انہوںنے کہا یونیورسٹیوں اور تحقیقی اداروں میں تعلیم اور تحقیق کے معیارمیں بہتری لانے کے لئے اختراعی اقدامات کئے جانے چاہئیں۔مشیر نے کہا کہ دنیا میں تیزی سے تبدیلی رونما ہور ہی ہے اور سائنسی ایجادات سے عوام کی بہبود اور بقا کو یقینی بنایا جا نا چاہیئے ۔اس موقعہ پر انجو بھسین نے کہا کہ پروگرام کا بنیادی مقصد یہ ہے کہ سائنس اور ٹیکنالوجی کے شعبے میں خواتین کے رول کو اُجاگر کیا جائے اور خواتین سائنسدانوں کو ایک دوسرے کے ساتھ استفسار کرنے کا موقعہ فراہم ہو۔پروگرام میں معروف سائنسدانوں ، تحقیق دانوں ،اساتذہ اور طلاب کی ایک بڑی تعداد نے شرکت کی۔
وومن سائنس کانگریس کا افتتاح
