زوری گنڈ بڈگام سے مرکزی امام باڑہ تک علم شریف کا جلوس

سرینگر// انجمن شرعی شیعیان کے اہتمام سے وادی بھر میں اتوار کو بھی جلوس ہاے عزا کا سلسلہ جاری رہا۔ جن مقامات پر تنظیم کے مشتہر شدہ پروگرام کے تحت علم شریف کے جلوس برآمد ہوئے اُن میں زوری گنڈ بڈگام ، سونہ پاہ بیروہ، در بل بمنہ ،کانی کچی میر بحری سرینگر،مغل محلہ سرینگر ،جڈی بل سرینگر ،چنگہ محلہ شالیمار،جے کے پی سی سی گلشن باغ ،گگلو محلہ زال پورہ سوناواری ،بڈی محلہ اندکھلوسوناواری ،ملہ پورہ نوگام شامل ہیں۔علم شریف کا سب سے بڑا جلوس زوری گنڈ بڈگام سے برآمد ہو کر مرکزی امام باڑہ بڈگام میں اختتام پزیر ہوا۔ جلوس عزا میں شامل عزا داروں سے خطاب کرتے ہوئے آغا سید مجتبیٰ عباس نے معرکہ کربلا کے مختلف گوشوں کی وضاحت کی۔انہوں نے شہدائے کربلا کو خراج عقیدت پیش کرتے ہوئے قیام حسینی کے اغراض و مقاصد کی تشریح کی۔ انہوں نے کہا کہ صدیاں گزرنے کے باوجود معرکہ کربلا کی اہمیت و افادیت قائم و دائم ہے ۔انہوں نے مزیدکہا کہ پیغام عاشورا کسی خاص مذہب یا مسلک کے لئے مخصوص نہیں بلکہ یہ ایک آفاقی پیغام ہے جس میں آج بھی وہی قوت اور کشش باقی ہے ۔