عظمیٰ نیوز سروس
گاندربل// ڈائریکٹر سریکلچر اعجاز احمد بٹ نے بدھ کو پبلک آؤٹ ریچ پروگرام کے تحت ضلع گاندربل کے کنگن کے قبائلی علاقوں کا ایک جامع دورہ کیا۔دورے کا بنیادی مقصد ریشم کے کیڑے پالنے والوں اور قبائلی علاقوں کے افراد کو محکمہ کی طرف سے فراہم کی جانے والی سہولیات اور مراعات کے بارے میں آگاہی پیدا کرنا تھا جو ریشم کے کیڑے کو باوقار روزی کمانے کے ذریعہ اپنانے میں دلچسپی رکھتے ہیں۔اس موقع پر ڈائریکٹر سریکلچر نے کہا کہ ریشم کے کیڑے پالنے کیلئے بڑی جگہ کی ضرورت نہیں ہوتی، اس طرح یہ عام اور بے زمین کاشتکاروں کیلئے قابل رسائی اور فائدہ مند ہے۔ انہوں نے عوام کو محکمہ کی جانب سے فراہم کی جانے والی سہولیات کے بارے میں بتایا جس میں ریشم کے کیڑے پالنے والوں کو مرحلہ وار پالنے کے شیڈ کی تعمیر کیلئے مالی امداد بھی شامل ہے۔ڈائریکٹر نے ضلع کے مختلف شہتوت کے فارموں اور نرسریوں کا دورہ کیا اور ڈگری کالج کیمپس کنگن میں صدف نذیر پرنسپل ڈگری کالج کنگن کی موجودگی میں شہتوت کا پودا لگا کر ایک وسیع شجرکاری مہم کا افتتاح کیا۔اس موقع پر ڈائریکٹر نے بتایا کہ محکمہ کی جانب سے شہتوت کی وسیع شجر کاری مہم کے تحت کنگن گاندربل میں 10000 شہتوت کے پودے لگانے کا ہدف ہے۔جموں و کشمیر میں شہتوت کے پودے لگانے کی اہمیت پر زور دیتے ہوئے انہوں نے بتایا کہ شہتوت کے پودے جموں و کشمیر میں ریشمی زراعت کے شعبے کی ترقی کو برقرار رکھنے اور ریشم کے کیڑے پالنے والوں کے لیے شہتوت کے پودوں کو آسانی سے دستیاب رکھنے کیلئے ناگزیر ہیں۔ڈائریکٹر سریکلچر نے ریشم کے کیڑے پالنے والوں اور کسانوں کیلئے صلاحیت سازی کی سرگرمیوں کے تحت ڈگری کالج کنگن میں 5 روزہ ہنر مندی کے تربیتی پروگرام کا بھی افتتاح کیا۔
