رمیش کیسر
نوشہرہ //جھنگڑ ڈے کی تقریبات کا آغاز بدھ کے روز راجوری ضلع کے جھنگڑ علاقے میں ایک پروقار پرچم مارچ اور عوامی رابطہ پروگرام کے ساتھ کیا گیا۔ اس موقع پر جھنگڑ کی آزادی اور عظیم فوجی رہنما بریگیڈیئر محمد عثمان کی بے مثال قربانیوں کو یاد کرتے ہوئے انہیں زبردست خراجِ عقیدت پیش کیا گیا۔یہ تقریب جھنگڑ بٹالین کی جانب سے منعقد کی گئی، جو تاریخی جھنگڑ ڈے کی یاد میں منعقد ہونے والی تقریبات کے سلسلے کی ایک اہم کڑی تھی۔ پروگرام میں مقامی لوگوں، طلبہ، بزرگوں اور سماجی شخصیات نے بڑی تعداد میں شرکت کی جبکہ حب الوطنی کے جذبے سے سرشار ماحول دیکھنے کو ملا۔
تقریب کے دوران گورنمنٹ مڈل اسکول سریا کے طلباء نے بھرپور جوش و خروش کے ساتھ پرچم مارچ میں حصہ لیا۔ طلبہ قومی پرچم تھامے اپنے اسکول سے بریگیڈیئر محمد عثمان میموریل تک مارچ کرتے ہوئے پہنچے جہاں انہوں نے عظیم فوجی افسر کو خراجِ عقیدت پیش کیا اور ملک کے دفاع میں ان کی تاریخی خدمات کو یاد کیا۔اس موقع پر منعقدہ بیداری پروگرام میں جھنگڑ ڈے کی تاریخی اہمیت اور بریگیڈیئر محمد عثمان کے کردار پر تفصیلی روشنی ڈالی گئی۔ مقررین نے کہا کہ بریگیڈیئر محمد عثمان نے ملک کے دفاع کے لئے غیر معمولی بہادری اور قربانی کا مظاہرہ کیا اور ان کی خدمات ہمیشہ یاد رکھی جائیں گی۔ طلباء اور مقامی باشندوں کو ان بہادر سپاہیوں کی قربانیوں کو یاد رکھنے کی تلقین کی گئی جنہوں نے وطن کی حفاظت کے لئے اپنی جانوں کا نذرانہ پیش کیا۔پروگرام کے دوران مقامی باشندوں، دیہی عمائدین اور کمیونٹی لیڈروں نے بھی اپنے خیالات کا اظہار کیا۔ ایک تعاملی نشست میں شرکاء نے جھنگڑ ڈے کی اہمیت، حب الوطنی، جرات اور بے لوث خدمت جیسے اقدار پر تبادلہ خیال کیا۔ مقررین نے کہا کہ قوم کے ہیروز کی قربانیوں کو نئی نسل تک پہنچانا وقت کی اہم ضرورت ہے تاکہ نوجوانوں میں قومی یکجہتی، حب الوطنی اور ملک کی خدمت کا جذبہ مزید مضبوط ہو سکے۔انہوں نے اس بات پر زور دیا کہ بریگیڈیئر محمد عثمان جیسے قومی ہیروز کی قربانیاں قوم کے لئے مشعلِ راہ ہیں اور ان کی زندگی نوجوان نسل کے لیے ایک بہترین مثال ہے۔ مقررین نے کہا کہ جھنگڑ ڈے صرف ایک تاریخی دن نہیں بلکہ ان قربانیوں کی یاد دہانی ہے جن کی بدولت ملک کی سلامتی اور خودمختاری برقرار ہے۔تقریب کے اختتام پر شرکاء نے اجتماعی طور پر حب الوطنی، اتحاد اور قربانی کے جذبے کو برقرار رکھنے کا عہد کیا۔ جھنگڑ بٹالین نے بھی اس بات کا اعادہ کیا کہ وہ مقامی عوام کے ساتھ مضبوط روابط قائم رکھنے کے ساتھ ساتھ جھنگڑ ڈے اور ملک کے لئے قربانی دینے والے بہادر فوجیوں کی یاد کو ہمیشہ زندہ رکھے گی۔
