عظمیٰ نیوز سروس
حیدرآباد// مرکزی وزیر جی کشن ریڈی نے جمعہ کو کہا کہ جموں و کشمیر کی ریاستی حیثیت کی بحالی کے مطالبے پر مرکزی حکومت مناسب وقت پر جواب دے گی لیکن انہوں نے زور دیتے ہوئے کہا کہ دفعہ 370 دوبارہ جموں و کشمیر میں لاگو نہیں ہو گا۔حیدرآباد میں صحافیوں کے ساتھ ایک غیر رسمی گفتگو کے دوران نیشنل کانفرنس کی جانب سے ریاستی حیثیت کی بحالی کے مطالبے پر سوال کے جواب میں ریڈی نے یہ بیان دیا۔ریڈی، جو جموں و کشمیر اسمبلی انتخابات کے دوران بی جے پی کے انچارج تھے، نے کہا کہ مرکزی حکومت کی کوششوں سے انتخابات پرامن انداز میں ہوئے اور دوبارہ پولنگ کرانے کی کوئی ضرورت پیش نہیں آئی۔انہوں نے کہا کہ بی جے پی کی کارکردگی قابلِ تعریف رہی اور اس نے پچھلے انتخابات کے مقابلے میں زیادہ نشستیں حاصل کیں۔ انہوں نے مزید کہا کہ جموں و کشمیر میں ووٹنگ کا تناسب حیدرآباد کے مقابلے میں زیادہ رہا، جہاں اسمبلی انتخابات میں صرف 50 فیصد ووٹر ٹرن آؤٹ ریکارڈ کیا گیا۔ریڈی نے کہا کہ جموں و کشمیر میں ڈسٹرکٹ ڈیولپمنٹ کونسل (DDC) اور بلاک ڈیولپمنٹ کونسل (BDC) کے انتخابات بھی کامیابی سے منعقد کیے گئے۔تلنگانہ حکومت کی جانب سے موسیٰ ندی کی بحالی اور حیدرآباد میں غیر قانونی تعمیرات کے خاتمے کی کوششوں پر بات کرتے ہوئے ریڈی نے غریبوں کے مکانات کو مسمار کرنے کی مخالفت کی۔
