ایک ماہ بعد گول رام بن شاہراہ چھوٹی گاڑیوں کی آمد ورفت کیلئے بحال پرنوٹ میں بحالی کا کام ہنگامی سطح پر جاری، جلد بڑی گاڑیوں کو چھوڑا جائیگا:ڈاکٹرشمشادہ شان

زاہد بشیر

گول// ضلع رام بن کے پرنوت علاقہ میں 25اپریل2024جمعرات کی رات کو اچانک پورا علاقہ دھنس گیا جس میں کم سے کم پہلے پچاس گھروں کو شدید نقصان پہنچا اور آہستہ آہستہ سے یہ پورا علاقہ دھنسے لگا جس وجہ سے سو کے قریب گھر مکمل طو رپر تباہ ہو گئے ساتھ ساتھ گول سب ڈویژن کوضلع ہیڈ کواٹر سے ملانے والی واحد شاہراہ بھی اس کے زد میں آئی اور بجلی کی 33کے وی لائن و وادی کشمیر کو جانے والی ٹرانسمیشن لائنوں کو بھی شدید نقصان پہنچا ۔ اس کے ساتھ پہ علاقے میں بچائو کاروائیاں جاری ہوئیں اور تب سے آج تک گول مکمل طور پر سڑک رابطہ سے کٹ گیا تھا ۔ اگر چہ ڈگڈول راستہ سے گول کو ملایا گیا تھا لیکن یہ شاہراہ خراب ہونے اور اس پر چلنا بھی کافی مشکل تھا گول کی عوام زیادہ تر جموں سفر کرنے کے لئے مہور کا رخ کرنے لگے جہاں سے وہ جموں جاتے تھے ۔ گریف کے سپرد اس سڑک کو کافی نقصان پہنچا جہاں جلد از جلد بحالی کا کام شروع کرنے میں بھی کافی رکاوٹیں پیش آئیں ۔ لگا تار شدید بارشوں کے دوران بھی یہاں پربحالی کا کام شروع نہیں ہو سکا ۔ انتظامیہ نے گول کو صدر مقام کے ساتھ جوڑنے کے لئے پرنوت میں دھنس جانے والی سڑک پر ہنگامی طو رپر کام شروع کیا اور کل ٹھیک ایک ماہ کے بعد اس پر پہلی گاڑی چھوڑی گئی ۔ کشمیر عظمیٰ کے ساتھ بات کرتے ہوئے ڈی ڈی سی چیر پرسن نے کہا کہ اس مقام پر مکمل طو رپر سرک دھنس گئی تھی جس وجہ سے آمد و رفت کو بحال کرنے میں کافی دقتیں پیش آئیں کیونکہ علاقہ لگا تار کھکس رہا تھا اور زمین بھی دل دل کی شکل اختیار کر گئی ۔ انہوں نے کہا کہ موسم نے ساتھ دیا جس وجہ سے گریف حکام کو بھی یہاں پر کام کرنے میں کافی آسانی ہوئی ۔ انہوں نے کہا کہ آج پہلی چھوٹی گاڑی کو چھوڑ دیاگیا اور جلد از پر بھاری گاڑیوں کو بھی چھوڑ دیا جائے گا ۔