ہندوستان – انگلینڈ ٹیسٹ سیریز | بی سی سی آئی کا شائقین کو شامل کرنے پر غور

چنئی// ہندوستانی کرکٹ کنٹرول بورڈ(بی سی سی آئی) ہنوستان اور انگلینڈ کے درمیان چنئی میں کھیلے جانے والے دوسرے ٹیسٹ میچ کے دوران شائقین کو شامل کرنے کے امکان کو تلاش کررہا ہے ۔ دونوں ٹیموں کے درمیان دوسرا ٹیسٹ میچ 13 فروری سے شروع ہونا ہے ۔ہندوستان اور انگلینڈ کے مابین چار ٹیسٹ میچوں کی سیریز 5 فروری سے شروع ہوگی اور اس کا دوسرا میچ چنئی میں 13 فروری سے کھیلا جائے گا۔ بی سی سی آئی اس میچ میں شائقین کو شامل کرنے پر تبادلہ خیال کر رہا ہے اور اس کے امکانات کو تلاش کرنے کی کوشش کررہا ہے ۔تمل ناڈو کرکٹ ایسوسی ایشن کے سکریٹری ایس راماسامی نے کِرک بَز کو بتایا ، "ہمیں سرکاری طور پر تحریرمیں کوئی معلومات موصول نہیں ہوئی ہے لیکن اتوار کے روز بی سی سی آئی کی طرف سے فون آیا تھا جس میں شائقین کو شامل کرنے کے امکان پر بات ہوئی ہے ۔ ہم پیر کو میٹنگ کریں گے کہ آیا اس کے لئے کچھ کیا جاسکتا ہے یا نہیں۔ پہلے اور دوسرے ٹیسٹ کے درمیان بہت کم وقت باقی ہے ۔ ہمارے پاس فی الحال سیلرنہیں ہے اور ہم نے ٹکٹ بھی نہیں چھاپے ہیں۔ ہمیں دیکھنا ہوگا کہ یہ ممکن ہے یا نہیں کیونکہ وقت بہت کم بچا ہے ۔ابتدامیں پہلے دو ٹیسٹ میچوں میں تماشائیوں کو شامل نہ کرنے کا فیصلہ کیا گیا تھا اور تمل ناڈو کرکٹ ایسوسی ایشن کی جانب سے اس سلسلے میں ایک بیان بھی جاری کیا گیا تھا۔ لیکن اب ایسا لگتا ہے کہ اس فیصلے میں کچھ تبدیلیاں لائی جاسکتی ہیں۔ انگلینڈ ویلز کرکٹ بورڈ (ای سی بی) کے رویہ میں بھی تبدیلی آئی ہے ، جو چنئی میں ہونے والے میچ میں تماشائیوں کو شامل نہیں کرنا چاہتے تھے ۔انگلینڈ ٹیم کے ترجمان نے کرک بز کو بتایا کہ ٹیم تعاون کرنے کے لئے تیار ہے ۔ ترجمان نے کہا ، "تماشائیوں کو شامل کرنے میں کوئی حرج نہیں ہے ۔ ہم بی سی سی آئی کی حکمت عملی اور پروٹوکول کی حمایت کرنا چاہتے ہیں۔ ہم اس پر تبادلہ خیال کر رہے ہیں اور ان کے جواب کا انتظار کر رہے ہیں۔