اشرف چراغ
کپوارہ //کرناہ میں سب ڈویژنل مجسٹریٹ کی کرسی دوماہ سے خالی ہونے کی وجہ سے لوگوں کو انتظامی معاملات میں مشکلات درپیش ہیں۔کرناہ سب ضلع کے سب ڈویثژنل مجسٹریٹ 50روزقبل نوکری سے سبکدوش ہوگئے اور تب سے یہاں نئے ایس ڈی ایم کاتقرر نہیں کیا گیا جس وجہ سے ایس ڈی ایم دفتر میں فائلوں کا انبارجمع ہوگیا ہے جو ایس ڈی ایم کی منظوری کی متقاضی ہیں۔اوریہاں معمول کاکام کاج ٹھپ ہے۔ ایک مقامی رہائشی طاہر قدوس نے کہا، ’’ایس ڈی ایم کی منظوری کی ضرورت والی فائلیں پچھلے چھ ہفتوں سے ڈھیر ہو رہی ہیں، جس سے ضروری انتظامی کام رکے ہوئے ہیں۔‘‘ ایک اہم انتظامی سربراہ کی عدم موجودگی نے خاص طور پر عوامی شکایات کے حل کو متاثر کیا ہے، جس سے رہائشی فوری مدد کے بغیر رہ گئے ہیں۔ ایک اور رہائشی وسیم بابا نے افسوس کا اظہار کیا۔ دریں اثنا ممبر قانون ساز اسمبلی (ایم ایل اے) کرناہ جاوید مرچال نے ایس ڈی ایم کے خالی عہدے کو پر کرنے میں ناکامی پر حکام کے خلاف سخت ناراضگی ظاہر کی ہے۔ انہوں نے کہا، ’’میں نے یہ مسئلہ اعلیٰ حکام کے ساتھ اٹھایا ہے لیکن کرناہ میں ایس ڈی ایم کا عہدہ ابھی تک پورا نہیں کیا گیا جس سے مقامی لوگوں کو پریشانی کا سامنا ہے۔‘‘ ایم ایل اے مرچال نے ایک بار پھر مطالبہ کیا ہے کہ ایس ڈی ایم کے خالی عہدے کو مزید تاخیر کے بغیر پْر کیا جائے تاکہ لوگوں کو درپیش مشکلات ختم ہوسکیں۔
