پیٹ کمنز کا دورۂ پاکستان کیلئے سیکورٹی انتظامات پر اظہارِ اطمینان

سڈنی //آسٹریلین ٹیسٹ ٹیم کے کپتان پیٹ کمنز نے کہا ہے کہ پاکستان میں آسٹریلین ٹیم کے لیے کیے گئے سیکیورٹی انتظامات سے مطمئن اور دورے کے لیے پرجوش ہیں۔ آسٹریلین ٹیم دورے کے لیے دو دن بعد آسٹریلیا سے روانہ ہو گی اور انہیں چار مارچ سے شروع ہونے والے تین ٹیسٹ میچوں کی سیریز کے پہلے میچ سے قبل تیاری کے لیے ایک ہفتے کا وقت ملے گا۔ ون ڈے اور ٹی20 سیریز سے قبل دونوں ٹیموں کے درمیان کراچی اور لاہور میں ٹیسٹ میچز بھی کھیلے جائیں گے۔ ان کا کہنا تھا کہ ہم سب سیکیورٹی سے مطمئن ہیں، موجودہ حالات میں بائیو سیکیورٹی کی اضافی سطح بھی موجود ہے لہٰذا ہم واقعی اچھا محسوس کر رہے ہیں اور ایک بار جب ہم وہاں پہنچ گئے تو ہم صرف کرکٹ پر توجہ مرکوز کر سکیں گے۔ آسٹریلین کپتان نے دورے کو خاص قرار دیتے ہوئے کہا کہ ہم وہاں جا رہے ہیں اور پہلی بار وہاں کھیلنے کا تجربہ حاصل کریں گے، ہم واقعی پرجوش ہیں۔ یاد رہے کہ 2009 میں لاہور میں سری لنکن ٹیم پر ہونے والے دہشت گرد حملے کے بعد پاکستان پر انٹرنیشنل کرکٹ کے دروازے بند ہو گئے تھے۔ اس کے بعد پاکستان ٹیم نے تقریباً ایک دہائی تک اپنی تمام ہوم ٹیسٹ سیریز نیوٹرل مقام پر کھیلیں پاکستان کو بیرون ملک ہوم انٹرنیشنل میچز کھیلنے پر مجبور کیا گیا البتہ 2015 میں محدود اوورز کی کرکٹ اور پھر پاکستان سپر لیگ کے کامیاب انعقاد کی بدولت ملک میں انٹرنیشنل کرکٹ کی واپسی کا سفر شروع ہوا۔ لیکن پچھلے سال سیکیورٹی خدشات اس وقت منڈلانے لگے تھے جب پاکستان آمد کے بعد میچ کے انعقاد سے چند گھنٹے قبل 18سال بعد پاکستان آنے والی نیوزی لینڈ کی ٹیم وطن واپس لوٹ گئی تھی۔