عشرت حسین بٹ
منڈی//ملی ٹینسی اور سرحد پار سے سرگرم ملک دشمن عناصر کے خلاف فیصلہ کن قانونی کارروائی کے تحت پونچھ پولیس نے تحصیل منڈی میں پاکستان میں مقیم ایک ملی ٹینٹ معاون جمال لون المعروف جمالا کی غیر منقولہ جائیداد ضبط کر لی ہے۔ یہ کارروائی عدالت کی ہدایات پر مکمل قانونی طریقہ کار کے مطابق انجام دی گئی۔پولیس کے مطابق یہ ضبطی پولیس اسٹیشن منڈی میں درج ایف آئی آر نمبر 07/2002، جو ای اینڈ آئی ایم سی او ایکٹ کی دفعہ 2/3 کے تحت درج ہے، کے سلسلے میں عمل میں لائی گئی۔ ضبط کی گئی جائیداد کل 06 کنال 13.5 مرلہ اراضی پر مشتمل ہے، جو خسرہ نمبر 291، 292، 287، 271، 222، 222/1، 221، 186، 180 اور 97 (منٹ) کے تحت آتی ہے۔ یہ اراضی تحصیل منڈی میں واقع ہے اور اس کی مالیت تقریباً 13.36 لاکھ روپے بتائی گئی ہے۔پولیس نے بتایا کہ مذکورہ جائیداد جمال لون المعروف جمالا، ولد سلطان لون المعروف سلطانہ، سکنہ چھمبر کناری، تحصیل منڈی کے نام درج ہے۔ ملزم اس وقت پاکستان میں مقیم ہے اور ملی ٹینٹ عناصر کے معاون کے طور پر کام کر رہا ہے۔ پولیس کے مطابق وہ اس سے قبل پاکستان/پاکستانی مقبوضہ جموں و کشمیر (PoJK) فرار ہو چکا تھا اور تب سے ملک کی سلامتی اور خودمختاری کے خلاف سرگرمیوں میں ملوث رہا ہے۔قانونی کارروائی سے مسلسل فرار کے باعث عدالت نے ملزم کو اشتہاری مجرم قرار دیا تھا۔ اس کی گرفتاری کے لئے متعدد کوششوں کے باوجود جب وہ قانون کی گرفت میں نہ آ سکا تو عدالت نے اس کی غیر منقولہ جائیداد ضبط کرنے کے احکامات صادر کیے۔ ان احکامات پر عمل کرتے ہوئے پونچھ پولیس نے محکمہ مال کے ساتھ قریبی تال میل کے ذریعے تمام قانونی تقاضے پورے کرتے ہوئے ضبطی کی کارروائی مکمل کی۔
