عظمیٰ نیوز سروس
راجوری//فوج کے دسویں ویٹرنز ڈے کی تقریبات کے سلسلے میں لائن آف کنٹرول پر واقع جھنگڑ سیکٹر میں ہفتہ کے روز ایک منفرد اور باوقار تقریب کا اہتمام کیا گیا، جہاں ناردرن کمان کے زیر اہتمام منعقد ہونے والی ’دھرو موٹر سائیکل ریلی‘ کو جھنگڑ بٹالین کی جانب سے بھرپور سہولت فراہم کی گئی۔ اس ریلی کا مقصد فوج کے سابقہ جوانوں کی جرات، قربانیوں اور بے لوث خدمات کو خراجِ تحسین پیش کرنا تھا۔یہ ریلی اپنی نوعیت کی پہلی کوشش ہے جو ایک روشن مشعل کے ساتھ جموں خطے کے مختلف فوجی مقامات سے گزرتی ہوئی آگے بڑھ رہی ہے۔ اس کا بنیادی ہدف فوجی ویٹرنز کی بہادری، خدمات اور غیر متزلزل عزم کو سلام پیش کرنا اور ساتھ ہی قومی یکجہتی اور فخر کے جذبے کو فروغ دینا ہے۔پانچ جنوری کو ادھم پور سے روانہ ہونے والی دھرو موٹر سائیکل ریلی جموں صوبے میں واقع سولہ کور کے پورے دائرہ اختیار سے گزر رہی ہے، جہاں یہ تقریباً 294 کلومیٹر کا فاصلہ طے کر رہی ہے۔ ہفتہ کے روز ریلی لائن آف کنٹرول کے جھنگڑ سیکٹر پہنچی، جہاں جھنگڑ بٹالین نے مکمل فوجی اعزاز کے ساتھ اس کا خیرمقدم کیا اور تمام ضروری انتظامات کئے۔ریلی کے دوران جھنگڑ کے عثمان میموریل پر ایک پْر وقار تقریب منعقد کی گئی، جس میں ملک کی خاطر جانوں کا نذرانہ پیش کرنے والے بہادر سپاہیوں کو خراجِ عقیدت پیش کیا گیا۔ اس موقع پر پھولوں کی چادر چڑھائی گئی اور شہداء کی عظیم قربانیوں کو خراجِ تحسین پیش کرتے ہوئے دو منٹ کی خاموشی اختیار کی گئی۔ریلی کے ساتھ موجود طبی عملے نے ’آروگیہ رکشک‘ مہم کے تحت ایک طبی کیمپ کا بھی اہتمام کیا، جہاں سابق فوجیوں، ویر نارِیوں اور شہداء کے اہل خانہ کا طبی معائنہ کیا گیا۔ مستحق افراد میں بلڈ پریشر جانچنے کی مشینیں بھی تقسیم کی گئیں، جس سے فوج کی جانب سے سابق فوجیوں کی فلاح و بہبود کے عزم کی جھلک واضح طور پر نظر آئی۔جھنگڑ سیکٹر میں اس ریلی کے انعقاد نے نہ صرف فوجی روایات کو زندہ رکھنے بلکہ سرحدی علاقوں میں عوام اور فوج کے درمیان مضبوط تعلقات کو فروغ دینے میں بھی اہم کردار ادا کیا۔ یہ تقریب اس بات کا عملی ثبوت بنی کہ بھارتی فوج اپنے سابق جوانوں کی قربانیوں کو ہمیشہ قدر کی نگاہ سے دیکھتی ہے اور ان کی خدمات کو فراموش نہیں کرتی۔
