عظمیٰ نیوزسروس
جموں//وزیرِ اعلیٰ عمر عبداللہ نے مولانا آزاد سٹیڈیم میں شیرِ کشمیر کرکٹ مقابلوں کے دوسرے دور کی ٹرافی کی رونمائی کی اور ٹیموں کی وردیوں کی نقاب کشائی بھی کی۔افتتاحی تقریب میں وزیرِ زراعتجاوید احمد ڈار،وزیرِ اعلیٰ کے مشیر ناصر اسلم ووانی ،مقابلوں کے منتظم تیجندر سنگھ سمیت دیگر منتظمین، شریک ٹیمیں اور متعلقہ حکام بھی موجود تھے۔وزیرِ اعلیٰ نے دن اور رات میں کھیلے جانے والے اس دوسرے شیرِ کشمیر کرکٹ مقابلوں کی ٹرافی کی نقاب کشائی کی اور شریک ٹیموں کی سرکاری وردیاں بھی جاری کیں۔اس موقع پر کھلاڑیوں سے گفتگو کرتے ہوئے وزیرِ اعلیٰ نے انہیں مقابلوں کے لیے نیک تمناؤں کا اظہار کیا۔شیرِ کشمیر کرکٹ مقابلوں کا دوسرا دور ایک سماجی آگاہی مہم کے طور پر منعقد کیا جا رہا ہے، جس کا مقصد صحت مند طرزِ زندگی کو فروغ دینا ہے۔یہ مقابلے منشیات کے استعمال سے دور رہنے کی اہمیت کو اجاگر کرتے ہیں اور نوجوانوں کو کھیلوں جیسی مثبت اور تعمیری سرگرمیوں میں حصہ لینے کی ترغیب دیتے ہیں۔برادری کے رہنماؤں، منتظمین اور شرکاء نے نوجوانوں میں اتحاد پیدا کرنے اور انہیں صحت مند اور بااصول زندگی گزارنے کی ترغیب دینے میں کرکٹ کے کردار کو اجاگر کیا۔
