مزید خبریں

 سید امجد شاہ

جمو// سرحدی سیکورٹی فورس (بی ایس ایف) کے ڈائریکٹر جنرل پنکج کمار سنگھ نے آر ایس پورہ میں بین الاقوامی سرحد اور ضلع جموں کے ارنیا کا دورہ کیا جہاں انہوں نے اپنے دو روزہ دورے کے اختتامی دن سیکورٹی صورتحال کا جائزہ لیا۔بی ایس ایف کے ایک عہدیدار نے بتایا کہ ڈائریکٹر جنرل بی ایس ایف نے بین الاقوامی سرحدی علاقے کے آر ایس پورہ اور ارنیا سیکٹرز کا دورہ کیا اور صورتحال کا جائزہ لیا۔بین الاقوامی سرحد کے دورے کے دوران ، ڈی جی کے ساتھ آئی جی بی ایس ایف جموں فرنٹیئر این ایس جموال اور دیگر افسران بھی تھے۔بی ایس ایف عہدیدار کے مطابق آئی جی بی ایس ایف این ایس جموال نے ڈی جی بی ایس ایف کو موجودہ سیکورٹی منظر نامے کے تحت آر ایس پورہ اور ارنیا سرحدی علاقے کے انتظام کی پیچیدگیوں سے آگاہ کیا۔انہوں نے کہا "ڈی جی بی ایس ایف نے بی ایس ایف کی مجموعی تعیناتی اور تسلط کے منصوبے کا جائزہ لیا۔ ڈی جی بی ایس ایف نے پھلکو نالہ کے اہم علاقوں اور آر ایس پورہ اور ارنیا بارڈر ایریا کے دیگر علاقوں کا دورہ کیا اور سیکٹر/یونٹ کمانڈروں سے زمین پر تبادلہ خیال کیا اور سیکیورٹی صورتحال کا جائزہ لیا۔اپنے دو روزہ دورے کے دوران ڈی جی بی ایس ایف نے بی ایس ایف جموں فرنٹیئر کی بین الاقوامی سرحد (IB) پر پورے علاقے کا دورہ کیا۔ انہوں نے فیلڈ مقامات کے دورے کے دوران بی ایس ایف کی جانب سے کی جانے والی پیچیدگیوں اور موثر سرحدی تسلط کو دیکھا۔دریں اثنا ، ڈی جی بی ایس ایف نے نیم فوجی اہلکاروں کے ساتھ بھی سینک سمیلن کے ذریعے بات چیت کی اور بین الاقوامی سرحدوں کی حفاظت کے لیے بی ایس ایف اہلکاروں کی لگن کی تعریف کی۔عہدیدار نے مزید کہا ، "اپنے دورے کی تکمیل کے بعد ڈی جی بی ایس ایف فورس ہیڈ کوارٹر بی ایس ایف نئی دہلی کے لیے روانہ ہوئے۔"

 

 

 

 محمد تسکین

بانہال//جموں سرینگر شاہراہ پر بانہال سے قریب گیارہ کلومیٹر دور ناچلانہ کے مقام دل کا دورہ پڑنے کی وجہ سے تکلیف سے دوچار ایک کار سوار کی جان فوج ، مقامی راہگیروں اور بعد میں سب ضلع ہسپتال بانہال میں ڈاکٹروں کی فوری کارروائی اور بروقت علاج سے بچائی گئی ہے اور اس مریض کی حالت thrombolysisیا جسم میں خون کو رواں کرنے کیلئے کئے جانے والے طریقہ علاج سے مستحکم کرنے کے بعد مریض کو شیر کشمیر انسٹیٹیوٹ آف میڈیکل سائنسز سرینگر منتقل کیاگیا ہے۔ بانہال میں ہسپتال ذرائع نے کشمیر عظمی کو بتایا کہ جمعرات کے روز ڈوڈہ سے تعلق رکھنے والا جاوید اقبال اپنی بیوی اور بیٹی کے ہمراہ خود چلارہے کار کے ذریعے ڈوڈہ سے سرینگر کی طرف آرہے تھے کہ جموں سرینگر قومی شاہراہ پر ناچلانہ کے قریب مریض کو سینے میں شدید درد کی شکایت ہونے لگی اور کار کو سڑک کنارے کھڑا کرنے کے بعد کار میں ماں بیٹی کی بے چینی کی طرف توجہ پاتے ہی نزدیکی آرمی کیمپ ناچلانہ کے فوجی اہلکار اور کچھ راہگیر کار میں پڑے مریض کو فوری طور پرسب ضلع ہسپتال بانہال پہنچایا جہاں ڈاکٹر شوکت احمد بٹ اور ڈاکٹر عاقب نجم نے اس پر thrombolysisکا علاج کیا اور ایک جان بچائی گئی۔ ڈاکٹر شوکت بٹ نے کشمیر عظمیٰ کو بتایا کہ کہ بانہال ہسپتال تک بروقت پہنچانے کے بعد اس ہارٹ اٹیک کے مریض جاوید اقبال کو فوری طور پر thrombolysisکے ٹریٹمنٹ کے ذریعے خون کی روانی کو بحال کیا گیا اور بانہال ہسپتال میں مستحکم کرنے کے بعد مریض کو شیر کشمیر انسٹیٹیوٹ آف میڈیکل سائنسز صورہ سرینگر منتقل کیا گیا ۔ ڈاکٹروں کی طرف ضروری ساز و سامان کے بغیر ہی کئے گئے علاج پر مقامی لوگوں اور انتظامیہ نے ڈاکٹروں کے کام کی سراہنا کی ہے ۔

 

جموں//جموںکے ضلع راجوری کے سرنکوٹ میں انٹی کورپشن بیورو نے ایک مصدقہ اطلاع ملنے کے بعد جموںو کشمیر پولیس کے ایک ہیڈ کانسٹیبل لو رشوت لیتے ہوئے گرفتار کر لیا ہے ۔اینٹی کرپشن بیورو کو ایک تحریری شکایت موصول ہوئی جس میں الزام لگایا گیا کہ تھانہ سورنکوٹ کے ہیڈ کانسٹیبل بشیر احمد شکایت کنندہ سے 10 ہزار روپے رشوت مانگ رہے ہیں۔ ہیڈ کانسٹیبل شکایت کنندہ کے والد ، بھائی اور چچا کے خلاف درج دفعہ109/341/354کے تحت تھانہ سورنکوٹ کے مقدمہ ایف آئی آر نمبر311/2021کا تفتیشی افسر تھا۔ ہیڈ کانسٹیبل بشیر احمد دھمکی دے رہا تھا کہ وہ شکایت کنندہ کے والد ، بھائی اور چچا کے خلاف ایک مضبوط کیس تیار کرے گا کہ اگر وہ رشوت کی رقم ادا نہیں کرے گا۔شکایت موصول ہونے پر ، 2021 کا ایک مقدمہ ایف آئی آر نمبر 04 ، سیکشن 7کے تحت کرپشن کی روک تھام ایکٹ ، 1988 کے تحت تھانہ اے سی بی راجوری میں درج کیا گیا اور تحقیقات شروع کی گئی۔اے سی بی نے اس حوالے سے ٹریپ ٹیم تشکیل دی گئی۔ ٹریپ ٹیم نے ایک کامیاب جال بچھایا اور ہیڈ کانسٹیبل بشیر احمد کو تھانہ سورنکوٹ ، ضلع پونچھ سے رنگے ہاتھوں پکڑ لیا جبکہ شکایت کنندہ سے رشوت مانگتے ہوئے قبول کیاگیا ہے جبکہ رشوت کی8ہزار کی رقم کو بھی جائے موقعے پر برآمد کر لیا گیا ہے ۔اس دوران راشی اہلکار کو گرفتار کیا گیا ہے اور مزید تحقیقات اس حوالے سے جاری ہے ۔

 

زاہد بشیر

گول// سنگلدان نیابت کے مولکوٹ علاقہ میں گزشتہ دو سال سے پانی کی بوند بوند کے لئے ترس رہے لوگوں نے سخت تشویش کا اظہار کرتے ہوئے کہا کہ علاقہ کے لوگ گزشتہ دو سال سے پانی کے لئے ترس رہے ہیں اور کئی مرتبہ لوگوں نے متعلقہ حکام سے بھی استدعا کی بھی تھی لیکن اس کی جانب کسی نے کوئی توجہ نہیں دی ۔ مقامی لوگوں کا کہنا ہے کہ حوض سے جو جرنل لائن آئی تھی اس کی کئی پائپیں ٹوٹ چکی ہیں جس وجہ سے آگے لوگوں کو پانی نہیں پہنچتا ہے ۔ لوگوں کا کہنا ہے کہ ڈی ڈی سی چیئرپرسن رام بن ڈاکٹر شمشادہ شان جو کہ سنگلدان کی ڈی ڈی سی ممبر بھی ہیں ،نے یہاں ایک جلسہ میں لوگوں کو اتنا یقین دلایا تھا کہ جلد یہاں پائپیں لائی جائیں گے اور لوگوں کو بناء کسی پریشانی پانی فراہم ہو گا لیکن آج چھ مہینے گزرنے کے با وجود اس کی یقین دہانی پر کوئی عمل درآمد نہ ہو سکا ۔ انہوں نے کہا کہ آج تک محکمہ کا کوئی آفیسر یہاں نہیں آیا اور نہ ہی علاقے میں پانی کی سپلائی کی طرف کوئی توجہ دی ۔ انہوں نے انتظامیہ سے مطالبہ کیا کہ علاقہ میں پانی کی فراہمی کو جلد یقینی بنایا جائے تا کہ لوگوں کو پانی سے متعلق کوئی پریشانی نہ ہو ۔

 

 

  

اشتیاق ملک

ڈوڈہ //ڈوڈہ ضلع میں کورونا وائرس کے 12 نئے مثبت معاملات سامنے آئے ہیں اور 3 مریض صحتیاب ہوئے ہیں۔اطلاعات کے مطابق جمعہ کو ڈوڈہ، بھدرواہ، ٹھاٹھری ،گندوہ و عسر میں ہوئی کوؤڈ جانچ کے دوران بارہ افراد کی ٹیسٹ رپورٹ مثبت آئی ہے جنہیں ہوم قرنطینہ میں رکھا گیا ہے اور تین مریض صحتیاب ہوئے ہیں۔اس طرح سے ضلع میں فعال کیسوں کی تعداد بڑھ کر 59 و شفایاب ہوئے مریضوں کی مجموعی تعداد 7512 پہنچ گئی ہے جبکہ ضلع میں 339605 افراد کو ٹیکے لگائے گئے ہیں اور اب تک کورونا وائرس سے 131 افراد فوت ہوئے ہیں۔

 

اشتیاق ملک

ڈوڈہ //ڈوڈہ کے قصبہ ٹھاٹھری میں نامعلوم افراد نے شب 5 دوکانوں سے لاکھوں مالیت کا سامان نقدی رقم اڑا لی تاہم سی سی ٹی فوٹیج میں ان کی تصویر سامنے آئی ہے۔اطلاعات کے مطابق جمعہ کی درمیانی شب پیش آئی چوری کی واردات میں نامعلوم افراد نے ایک موبائل دوکان، دو کپڑے و ہارڈویئر کی دوکانوں میں گھس کر لاکھوں کی مالیت کا سامان و نقدی رقم اپنے ساتھ لے گئے ہیں۔اس دوران ایک شخص کی تصویر بھی سی سی ٹی کیمرے کے ذریعے سامنے آئی ہے تاہم ابھی تک اس کی شناخت نہیں ہو پائی ہے۔ادھر بیوپار منڈل نے قصبہ میں پیش آئی چوری کی واردات پر تشویش کا اظہار کرتے ہوئے کہا کہ سیکورٹی فورسز و پولیس کی بھاری نفری کی تعیناتی کے بعد بھی اسطرح کے واقعات رونما ہوتے ہیں۔صدر پرویز احمد کچلو نے کہا کہ اس سے پہلے بھی کئی وارداتیں پیش آئیں ہیں لیکن پولیس ملزموں کو پکڑنے میں ناکام ہوئی ہے۔انہوں نے کہا کہ کچھ ماہ قبل بازار سے ایک تین سالہ بچی لاپتہ ہو گئی جبکہ آگ کی پر اسرار واردات میں بھی بھاری نقصان پہنچا اور پولیس نے کوئی کارروائی عمل نہیں لائی۔کچلو نے کہا کہ قصبہ میں اسطرح کی وارداتوں میں اضافہ ہو رہا ہے جوکہ افسوسناک ہے۔انہوں نے قصبہ کی حفاظت کو یقینی بنانے و ایسے افراد کو بے نقاب کرنے کے لئے وسیع پیمانے پر اقدامات کرنے کا مطالبہ کیا ہے۔اس سلسلہ میں جب ایس ایچ او ٹھاٹھری امرت کٹوچ سے رابطہ کیا تو انہوں نے کہا کہ ایف آئی آر زیر نمبری 103/2021 U/S457/380IPC درج کر کے تحقیقات شروع کی ہے۔انہوں نے کہا کہ چوری کی وارداتوں میں ملوث افراد کے خلاف سخت کارروائی عمل میں لائی جائے گی۔