عظمیٰ نیوز سروس
سرینگر//پیپلز ڈیموکریٹک پارٹی کی صدر محبوبہ مفتی نے مرکزی وزیر گریراج سنگھ کے بڑھتے ہوئے پولرائزنگ بیانات پر شدید ناراضگی کا اظہار کیا۔ ان کا کہنا تھا کہ ایسے ریمارکس بھارت کی سیکولر بنیادوں کو کمزور کرتے ہیں، جنہیں مہاتما گاندھی کے اصولوں نے قائم کیا تھا اور جو قومی ہم آہنگی کے لیے ناگزیر ہیں۔ محبوبہ مفتی نے موجودہ سیاسی ماحول کو “کورو راجیہ” سے تشبیہ دی اور کہا کہ خواتین کے ساتھ ناانصافی اور عدم احترام عوامی گفتگو میں خطرناک حد تک عام ہوتا جا رہا ہے۔ انہوں نے افسوس ظاہر کیا کہ بہار کے وزیرِ اعلیٰ نتیش کمار نے اس معاملے پر کوئی مداخلت نہیں کی، حالانکہ ایک آئینی اتھارٹی کے طور پر ان کی ذمہ داری تھی کہ وہ سیاسی جواب دہی کو یقینی بناتے۔ ان کا کہنا تھا کہ اشتعال انگیز زبان کے سامنے خاموشی مزید تقسیم کو جنم دیتی ہے، اور انہوں نے ملک بھر کی سیاسی قیادت پر زور دیا کہ وہ انصاف اور تحمل کے ساتھ آگے بڑھیں تاکہ قومی اتحاد کو برقرار رکھا جا سکے۔
