یو این آئی
نئی دہلی//کانگریس نے عام انتخابات 2024 کے لئے تشہیری کمیٹی تشکیل دی ہے ۔کانگریس جنرل سکریٹری کے سی وینوگوپال نے کہا کہ پارٹی صدر ملکارجن کھڑگے نے اس کمیٹی کو منظوری دے دی ہے اور تمام عہدیداروں سے کہا ہے کہ وہ اپنا کام فوری طور پر شروع کریں۔انہوں نے بتایا کہ کانگریس کے خزانچی کو مہم کمیٹی کا کوآرڈینیٹر بنایا گیا ہے ۔ کانگریس جنرل سکریٹری آرگنائزیشن، جنرل سکریٹری کمیونیکیشن ڈپارٹمنٹ، ایڈمنسٹریٹو ڈپارٹمنٹ کے انچارج، میڈیا اینڈ پبلسٹی ڈپارٹمنٹ کے سربراہ، سوشل میڈیا ڈیپارٹمنٹ کے سربراہ کو کمیٹی میں رکھا گیا ہے ۔کمیٹی کے لیے خصوصی طور پر مدعو کیے گئے اراکین کے ناموں کا اعلان ان کی رضامندی کی بنیاد پر کیا جائے گا۔ادھرکانگریس صدر ملکارجن کھڑگے نے کہا ہے کہ وزیر اعظم نریندر مودی آئین کو نہیں مانتے اور ہمیں پارلیمنٹ میں بولنے کی اجازت بھی نہیں دیتے ، اس لیے کانگریس ‘بھارت جوڑو نیائے یاترا’ کا انعقاد کرکے عوام کے درمیان جا رہی ہے ۔ تاکہ ہم ان سے بات کر سکیں اور سماج کے ہر طبقے سے مل سکیں اور ان کی بات سن سکیں۔
