اگلے چند روز میں موسم جزوی طور پر ابر آلود رہے گا: محکمہ موسمیات
عظمیٰ نیوز سروس
سرینگر// موسمیاتی مرکز سرینگر نے اگلے چند دنوں میں جموں و کشمیر میں ابر آلود موسم کی پیش گوئی کی ہے۔ تاہم، 13 سے 15 دسمبر تک شمالی کشمیر اور وسطی کشمیر کے اونچے علاقوں میں ہلکی برفباری کا امکان ظاہر کیاہے۔محکمہ موسمیات نے پیر کو موسم کی پیش گوئی کرتے ہوئے کہا کہ10-12 دسمبر تک، کوئی بڑی سرگرمی متوقع نہیں ہے، اور موسم جزوی طور پر ابر آلود رہے گا۔تاہم اسکے بعد وادی میں موسم کی سرگرمی میں تبدیلی کا امکان ہے۔ انہوں نے کہا کہ شمالی اور وسطی کشمیر کے بالائی علاقوں میں 13 سے 15 دسمبر تک ہلکی برف باری ہوگی۔16 دسمبر کو موسم جزوی طور پر ابر آلود رہے گا اور اگلے تین دن یعنی 18 دسمبر تک ایسا ہی رہے گا۔مزید، پیشن گوئی میں کہا گیا ہے کہ 19-21 دسمبر تک، جموں و کشمیر میں مخلوط موسمی سرگرمی کا سامنا کرنا پڑے گا۔ موسم ابر آلود رہنے کی پیش گوئی کی گئی ہے، چند اونچائی پر ہلکی برفباری کا امکان ہے۔
سونمرگ
غلام نبی رینہ کنگن نے اطلاع دی کہ اتوار کی شب یہاں ہلکی برفباری پر سیاح خوش نظر آرہے تھے۔ اتوار کی شب سونمرگ،تھجواس ،زوجیلا، بالتل اور کرگل کے گومری، دراس اور منی مرگ میں ہلکی برفباری ہوئی ۔ تازہ برفباری کے باعث اگرچہ سرینگر لداخ شاہراہ کو اتوار کی صبح عارضی طور پر ٹریفک کی نقل و حمل کے لئے بند کردیا گیا تھا لیکن باڈر روڈ آرگنائزیشن نے زوجیلا سڑک سے برف صاف کرنے کے لئے کام شروع کرکے شاہراہ کو آمدورفت کے قابل بنادیا جس کے بعد شاہراہ پر ٹریفک کی نقل و حمل بحال کردی گئی ۔
درجہ حرارت
جموں و کشمیر میں اتوار کی رات کو شدید سردی نے اپنی گرفت مضبوط کر لی ۔ وادی کے بیشتر سٹیشنوں پر کم از کم درجہ حرارت ایک بار پھر انجماد سے نیچے گر گیا، شوپیان منفی4.2 ڈگری پر سرد ترین درجہ حرارت کے طور پر ابھرا۔سری نگر شہر میں منفی2.4 ،اننت ناگ میں منفی1.4 ، ، پلوامہ میں منفی3.1 ، اور پہلگام میں منفی0.4 پر درجہ حرارت مسلسل کم رہا۔ کوکرناگ ان چند مقامات میں شامل تھا جو نقطہ انجماد سے بالکل اوپر 0.1 C پر ٹھہرا تھا۔ کپواڑہ میں منفی1.2 بانڈی پورہ منفی2.2 ، اور بارہمولہ میں منفی3.1 ریکارڈ کیا گیا۔ سونمرگ میں منفی2.8 ڈگری سینٹی گریڈ رہا۔دریں اثنا، جموں خطہ نسبتاً زیادہ گرم رہا۔ جموں شہر میں 7.9 ، کٹرہ 9.6 ، بانہال 4.5 ، بھدرواہ 2.6 ، اور ادھمپور میں 2.0 ریکارڈ کیا گیا۔لداخ میں درجہ حرارت مسلسل گرتا رہا، لیہہ میں منفی6.2 ، اورکرگل میں منفی5.0 رہا۔
