راہول گاندھی کی سیکورٹی کے ساتھ کوئی سمجھوتہ قبول نہیں

نیوزڈیسک
سانبہ//کانگریس نے کہاہے کہ راہل گاندھی، جو اس وقت بھارت جوڑو یاتراکے سلسلے میں جموںکشمیر میں موجود ہیں، کی حفاظت کے حوالے سے فکر مند ہے کیوں کہ جموں میں گزشتہ دنوں ہوئے دھماکوں سے یہ پتہ چلتا ہے کہ خطے میں ملی ٹینسی ختم نہیں ہوئی ہے جیسا کہ سرکار دعویٰ کررہی ہے ۔ سانبہ میں پریس کانفرنس سے خطاب کرتے ہوئے کانگریس لیڈر جے رام رمیش نے کہا ہے کہ سرکار کو چاہئے کہ وہ رہل گاندھی کی بھارت جوڑو یاترا کو مکمل تحفظ فراہم کرنے کیلئے موثر اقدامات اُٹھائے ۔ انہوںنے بتایا کہ بی جے پی نے جموں کشمیر سے متعلق جو دعوئے کئے ہیں،زمینی سطح پر اس کے برعکس ہے ۔انہوںنے کہا کہ راہل گاندھی کی سیکورٹی پر کوئی سمجھوتہ نہیں کیا جائے گا جوجموں و کشمیرمیں ‘بھارت جوڑو یاترا’ کی قیادت کر رہے ہیں ۔رمیش نے کہا کہ دہشت گردی پر پارٹی کا موقف واضح ہے اور دہشت گردی کے مرتکب یا اسپانسر سے نمٹنے میں کوئی سمجھوتہ نہیں کیا جا سکتا۔ انہوں نے بتایا کہ راہل گاندھی کی سلامتی پر کوئی سمجھوتہ نہیں کیا جائے گا۔ ان کی حفاظت ہماری اولین ترجیح ہے اور ہم مکمل طور پر سیکورٹی ایجنسیوں کی ہدایات پر عمل کر رہے ہیں۔جے اینڈ کے اے آئی سی سی انچارج رجنی پاٹل، جموں و کشمیر کانگریس کے سربراہ وکار رسول وانی اور پارٹی کے ترجمان اعلیٰ رویندر شرما نے بھی پریس کانفرنس سے خطاب کیااوراس بات پر زور دیا کہ یاترا شیڈول کے مطابق اختتام پذیر ہوگی۔ نروال حملے کی مذمت کرتے ہوئے پارٹی ترجمان شرما نے کہا کہ جموں و کشمیر میں یاترا کا آخری مرحلہ سیکورٹی ایجنسیوں کی مشاورت سے تیار کیا گیا تھا۔انہوںنے کہا کہ “ہم اپنے لیڈر کی حفاظت اور سلامتی کے بارے میں فکر مند ہیں۔انہوں نے کہا کہ ہم تسلیم کرتے ہیں کہ سیکورٹی ایجنسیاں پوری طرح الرٹ ہیں اور اپنا کام تسلی بخش طریقے سے کر رہی ہیں، لیکن حکومت کے یہ دعوے کہ دہشت گردی کو ختم کر دیا گیا ہے، ایسے واقعات کے تناظر میں بے بنیاد ہیں۔ گزشتہ 31 دسمبر کوانہوں نے (سیکورٹی ایجنسیوں) نے دعویٰ کیا کہ دہشت گردی کا خاتمہ کر دیا گیا ہے اور اگلے دن راجوری کے ڈانگری گاؤں میں ایک حملہ ہوا، جس میں اقلیتی برادری سے تعلق رکھنے والے سات افراد ہلاک ہو گئے۔پارٹی کے ترجمان نے یہ بھی کہا کہ یاترا کے پروگرام میں کوئی تبدیلی نہیں کی جائے گی کیونکہ اس کی سختی کی منصوبہ بندی سیکورٹی ایجنسیوں اور لیفٹیننٹ گورنر انتظامیہ کے ذریعہ جاری کردہ رہنما خطوط کے مطابق کی گئی ہے ۔آئین کے آرٹیکل 370 کو منسوخ کرنے کے بارے میں پارٹی کے موقف کے بارے میں پوچھے جانے پر، کانگریس لیڈر نے کہاکہ یہ ایک سنگین مسئلہ ہے، لیکن اس وقت جو زیادہ سنگین ہے وہ جموں و کشمیر میں جمہوری سرگرمیوں کی بحالی ہے۔جموں و کشمیر وزارت داخلہ کا ایک منسلک دفتر بن گیا ہے۔ یہاں حقیقی مسائل ہیں جیسے یونین کے زیر انتظام علاقے میں اسمبلی انتخابات کب ہوں گے اور اسے مکمل ریاست کا درجہ کیسے ملے گا۔