یواین آئی
نارتھ ساؤنڈ/دھننجے ڈی سلوا 120، دنیش چندیمل 54 اور سونل دنوشا 43 کی عمدہ اننگز کی بدولت سری لنکا نے ویسٹ انڈیز کے خلاف پہلے ٹیسٹ کے پہلے دن اپنی پہلی اننگز میں 308 رنز بنا کر آل آؤٹ ہو گئی۔ویسٹ انڈیز نے جمعرات کو ٹاس جیت کر پہلے گیند بازی کا فیصلہ کیا۔ سری لنکا کا آغاز اچھا نہ رہا اور اس نے 42 رنز پر اپنی تین وکٹیں گنوا دیں۔ پتھم نسانکا دو، نشان مدوشکا 23 اور کامندو مینڈس بغیر کوئی رن بنائے آؤٹ ہوئے ۔
اس کے بعد دھننجے ڈی سلوا اور دنیش چندیمل نے اننگز کو سنبھالتے ہوئے چوتھی وکٹ کے لیے 68 رنز کی شراکت قائم کی۔ 25ویں اوور میں شمار جوزف نے چندیمل کو آؤٹ کر کے یہ شراکت توڑ دی اور اسی اوور میں کسل مینڈس کو بھی کھاتہ کھولے بغیر پویلین بھیج دیا۔ چندیمل نے 67 گیندوں پر آٹھ چوکوں کی مدد سے 54 رنز بنائے ۔بعد ازاں سونل دنوشا نے دھننجے ڈی سلوا کے ساتھ چھٹی وکٹ کے لیے 99 رنز جوڑ کر سری لنکا کا اسکور 200 کے پار پہنچایا۔ سونل دنوشا 43 رنز بنا کر آؤٹ ہوئے ۔65ویں اوور میں جسٹن گریوز نے دھننجے ڈی سلوا کی شاندار اننگز کا خاتمہ کیا۔ انہوں نے 168 گیندوں پر 17 چوکوں کی مدد سے 120 رنز بنائے ۔ملن رتنایکے 27 اور کسون راجیتھا آٹھ رنز بنا کر آؤٹ ہوئے ۔ 72ویں اوور میں جیڈن سیلز نے اسیتھا فرنینڈو کو بغیر کوئی رن بنائے آؤٹ کر کے سری لنکا کی پوری ٹیم کو 308 رنز پر سمیٹ دیا۔پہلے دن کھیل ختم ہونے تک ویسٹ انڈیز نے چھ گیندیں کھیلیں، تاہم کوئی رن نہ بنا سکی۔ جان کیمبل اور برانڈن کنگ بغیر کوئی رن بنائے کریز پر موجود تھے ۔ویسٹ انڈیز کی جانب سے جسٹن گریوز نے تین وکٹیں حاصل کیں، جبکہ کیمار روچ، الجاری جوزف اور شمار جوزف نے دو، دو کھلاڑیوں کو آؤٹ کیا۔
