جموںصوبہ میں ایک ہی دن میں ڈینگی کے232 مثبت کیس،جموں ضلع میں 152 رپورٹ

 مثبت معاملات میں اضافہ کا رجحان جاری،بچوں میں پھیلائو تشویشناک: پرنسپل جی ایم سی جموں
سید امجد شاہ
جموں//پرنسپل گورنمنٹ میڈیکل کالج جموںڈاکٹر ششی سودھن شرما نے جمعرات کو کہا کہ جموں کو ڈینگی کی وباکا سب سے بڑا چیلنج درپیش ہے کیونکہ جموں خطہ میں ڈینگی کے سب سے زیادہ 232 مثبت کیس رپورٹ ہوئے جن میں 28 بچے اور 204 بالغ شامل ہیں۔ ڈاکٹر ششی نے ایک پریس کانفرنس سے خطاب کرتے ہوئے کہا”ہمیں جموں میں ڈینگی کے سب سے بڑے چیلنج کا سامنا ہے۔ گزشتہ ایک ہفتے سے ڈینگی کے پھیلاؤ میں اضافے کا رجحان ہے جس کا مطلب ہے کہ مثبت کیس بڑھ رہے ہیں‘‘۔جی ایم سی جموں کے پرنسپل نے کہا کہ “زیادہ تر معاملات میںبخار والے مریضوں کا ٹیسٹ ڈینگو کے ساتھ مثبت پایا جاتا ہے”۔انکاکہناتھا کہ بچوں کے ہسپتالوں میں روزانہ کی بنیاد پر 80 سے 90 داخلوں کے ساتھ ہمارے داخلوں میں اضافہ ہوا ہے جو کہ تشویشناک بات ہے۔ اسی طرح، ہسپتال میں روزانہ کی بنیاد پر 50 سے 60 بالغوں کے داخلے ہو رہے ہیں۔انہوں نے کہا کہ ڈینگی سے متاثرہ پانچ مریضوں کی موت ہو چکی ہے۔ ڈینگی سے متاثرہ پانچوں مریضوں کو بعد کے مراحل میں پیری فیرل (ہسپتالوں) سے ریفر کیا گیا اور وہ یہاں (جی ایم سی جموں) مر گئے حالانکہ انہیں بہترین علاج فراہم کیا گیا تھا۔ڈاکٹر سودھن نے مزید کہا”ڈینگی کی وجہ سے مرنے والے پانچ بالغ افراد کو صحت کے متعدد مسائل تھے اور انہیں ہسپتال میں دیر سے داخل کیا گیا تھا”۔ انہوں نے کہا کہ اگرچہ ڈینگی ایک معمول کا موسمی بخار ہے لیکن یہ 2011 اور پھر 2013 میں ڈینگی کی وبا میں تبدیل ہو گیا۔انہوںنے کہا”اب یہ ایک بڑی وبا ہے اور مزید جہتیں حاصل کر رہی ہے”۔ انہوں نے کہا کہ حکومت صورتحال کا جائزہ لے کر پھیلاؤ کو کنٹرول کرنے کے لیے بہت سنجیدگی سے کام کر رہی ہے۔ انہوں نے مزید کہا کہ کل ہمارے انتظامی محکمے نے ایک میٹنگ میں رائے لی۔تاہم انہوں نے ڈینگی کے پھیلاؤ پر قابو پانے اور صفائی ستھرائی کو یقینی بنانے اور رہائشی کالونیوں اور گھروں کے ارد گرد پانی جمع کرنے سے گریز کرنے کے لیے عوامی شرکت کی اپیل کی۔گورنمنٹ میڈیکل کالج جموں کے پرنسپل اور ڈین ڈاکٹر ششی سدھن شرما نے کہا کہ ڈینگی مچھروں سے پھیلنے والی ایک موسمی وائرل بیماری ہے جو تیزی سے تمام خطوں میں پھیل چکی ہے اور ڈینگی کے مریضوں میں اضافہ تشویشناک ہواہے۔ڈاکٹرشرما نے کہا کہ ڈینگی مچھر ملیریا کے مچھر سے مختلف ہے اور یہ صبح یا شام کے وقت کاٹتا ہے اور اس سے بچنے کا بہترین طریقہ احتیاط ہے۔انہوںنے کہا کہ اس بیماری کی روک تھام کے لیے کمیونٹی کو آگاہ اور ذمہ دار ہونا چاہیے ۔انہوں نے کہا کہ “جی ایم سی جموں صورتحال سے نمٹنے کے لیے پوری طرح تیار ہے اور کہا کہ ڈینگی کے بڑھتے ہوئے کیسوں پر قابو پایا جا رہا ہے اور پھیلنے سے بچنے کے لیے تمام اقدامات کیے جا رہے ہیں”۔دریں اثنا محکمہ پی اینڈ ایس ایم کے سربراہ ڈاکٹر راجیو گپتا نے کہا کہ ڈینگی ایک وائرس کی وجہ سے ہوتا ہے جو زیادہ تر ایڈیس ایجپٹائی نسل کے مادہ مچھروں کے کاٹنے سے پھیلتا ہے۔ ڈینگی کی کوئی علامات نہیں ہوتی ہیں یا صرف ہلکی بیماری ہوتی ہے، لیکن یہ فلو جیسی علامات کا بھی سبب بن سکتا ہے جیسے تیز بخار، شدید سر درد، آنکھوں کے پیچھے درد، متلی، الٹی، سوجن غدود، ددورا، پٹھوں، جوڑوں، یا ہڈیوں میں درد”۔انہوں نے مزید کہا کہ ڈینگی سے محفوظ رہنے کے لیے اپنے گردونواح میں کسی بھی کنٹینر میں پانی جمع ہونے سے گریز کریں۔اس دوران کل جمعرات کو خطے میں ڈینگی کے 232 مثبت کیس ریکارڈ ہوگئے ہیں۔ سرکاری اعداد و شمار کے مطابق 28 بچے بشمول 12 لڑکیاں، 75 خواتین سمیت 204 بالغ افراد ڈینگی سے متاثر ہوئے۔سرکاری اعداد و شمار کے مطابق جموں خطہ میں ڈینگی کے 3849 مثبت کیس رپورٹ ہوئے ہیں اور 12ہزار944 ٹیسٹ کیے گئے ہیں۔ اسی طرح اکیلے جموں ضلع میں ڈینگی کے 152 مثبت کیس ریکارڈ کیے گئے ہیں اور اس کے بعد ادھم پور میں ڈینگی کے 62 کیس ہیں۔راجوری ضلع میں ڈینگی کے 6 کیس رپورٹ ہوئے ہیں، 3 کشتواڑ سے، سانبہ، کٹھوعہ اور رام بن سے دودواور کشمیر سے ایک کیس ریکارڈ کیاگیا ہے۔