عظمیٰ نیوز سروس
سرینگر// انسداد بدعنوانی بیورو (اے سی بی) نے منگل کوسری نگر میں حلقہ بٹہ مالو کے ایک پٹواری کو شکایت کنندہ کے رشتہ دار کے حق میں ریونیو اقتباس جاری کرنے کے لیے 10,000 روپے کی رشوت طلب کرتے ہوئے رنگے ہاتھوں گرفتار کیا ہے۔ ایک بیان میں، ترجمان نے کہا کہ جموں و کشمیر اینٹی کرپشن بیورو کو ایک تحریری شکایت موصول ہوئی ہے جس میں الزام لگایا گیا ہے کہ پٹواری حلقہ بٹہ مالو سری نگر صفدر حسین میر 10000 روپے رشوت کا مطالبہ کر رہا ہے ۔ شکایت کنندہ نے اے سی بی سے رجوع کیا۔شکایت موصول ہونے پر، ایک پری ٹریپ تصدیق کی گئی، جس سے رشوت کی مانگ ثابت ہوئی، اس کے مطابق ایک مقدمہ FIR نمبر 05/2026 U/S 7 PC ایکٹ 1988 ACB PS سری نگر میں درج کیا گیا اور تفتیش شروع کی گئی۔ تفتیش کے دوران ایک ٹریپ ٹیم تشکیل دی گئی۔ ٹیم نے کامیاب جال بچھا کر ملزم صفدر حسین، پٹواری کو شکایت کنندہ سے 10000 روپے رشوت طلب کرتے ہوئے رنگے ہاتھوں پکڑ لیا۔ ملزم کو تمام طبی جانچ مکمل کرنے کے بعد حراست میں لے لیا گیا۔ کیس کی مزید تفتیش جاری ہے۔ دریں اثناء شوپیان میں 20 دسمبر 2025کو پٹواری عاشق حسین شاہ ساکن ترکہ وانگام کی اے سی بی کے ہاتھوں رنگے ہاتھوں گرفتاری کی لوگوں نے سراہنا کرتے ہوئے اس کی غیر قانونی جائیداد کا پتہ لگانے اور مزید تحقیقات کی مانگ کی ہے ۔
